Rome lal thar AlexanderZverev

Alexander Zve­rev chuan No­vak Djokovic hneh­in Italian Open no­mawi a chawi. Ger­man rawlthar hian Pathianni zan khan world number 2 lakah hian darkar khat leh minute 23 chhungin 6-4, 6-3 in hnehna a chang.

Rome-a final khelh­ah kum 20-a upa Zverev hian a tir a ṭanga a tawp thlengin inkhel a thunun tluan chhuak zak. Serbian tlangval hi break point a hmuhtir miah lo a, set hmasa berah a service vawi khat chhuhsakin set hnuhnung zawkah ṭum hnih a chhuhsak bawk.

World number 17 Zverev hi tunah kum 20 leh thla khata upa chauh a la ni a, tun hnai kum 10 chhungin ATP Masters 1,000 inelna huang chhunga champoin thei naupang ber a ni - tunkara ranking chhuak thar berah a sang 10 zingah a tel phak tawh ang.

Chak lo zawk Djokovic-a'n inkhelh banah coach thar a neih tur thu a puang, a hming chu Andre Agassi a ni. World number 1 hlui Agassi leh Grand Slam vawi 12 champion tawh Djokovic te hi May 28 a khelh tur French Open-ah an thawkdun dawn a ni.

Kum 30-a upa Djokovic chuan, "Agassi nen hian Paris-ah kan thawkdun ang, hun rei tak chhung atan inremna kan siam rih lo. French Open atan chauh a ni rih a, inelna neih zawhah inbiakna a awm leh ang," tiin a sawi.