IPL champion Mumbai Indians
Indian Premier League final chu Pathianni zan khan khelh a ni a, inkhel hmuhnawm takah Mumbai Indians chuan run khat leka Rising Pune Supergiant hnehin an champion - Mumbai club hi IPL-a vawi thum champion thei hmasa ber an ni nghal bawk.
Mumbai Indians tan Mitchell Johnson chu chhandamtu a ni. Over tawp berah Pune-in chak turin run 11 an mamawh a, boruak a sang takzet. Kum 35-a upa bowler a lo pen chhuak a, a ball vawm hmasa berah run li a pe nghal - a zam phah lo. Australian fast bowler hian a zawnin Manoj Tiwary leh Steve Smith a vawm out zui a, a team hnehna a chanpui.
Mumbai = Out
Hyderabad khawpuia inkhelah Mumbai Indians an bat hmasa zawk a, beisei an phak lo hle - over 20 ah run 129 siamin wicket riat an hloh! MI hian league round match hnih leh qualifier 1-ah Rising Pune hi an lo ngam lo tawh a, final-ah pawh an tlawm nawn leh ngei dawn niin a lang.
Mumbai Indians tan opener Lendl Simmons (3 runs) leh Parthiv Patel (4) te inkawpin run sarih pawh an tlin hman lo a, run siam hnem ber Krunal Pandya chuan run 47 vaw chhuakin captain Rohit Sharma meuh pawhin run 24 bak a tlin lo - MI tan beisei a bo hle.
Pune an chuai
Rising Pune batting line-up thlirin an target run 130 hi siam harsa niin a lang lo. Opener Ajinkya Rahane chuan run 47 ngawt siamin bul a rawn ṭan ṭha viau a, run 51 siamtu captain Steven Smith a kaltluang bawk si nen Mumbai Indians beiseina a chau hman hle.
Mahse, MI tan Mitchell Johnson a inlar a, over li a vawmah run 26 lek pein wicket thum a la - kum 35-a upa bowler hian opener Rahane a vawm chhuah bakah last over-a Tiwary leh Smith a vawm out avangin MI champion hi a hlawhchhuah ang hiala chhiar pawh a sual lo ang - Pune hian over 20-ah run 128 siamin wicket ruk an hloh a, run khatin an tlawm.
Smith mission
Mitchell Johnson-a'n Steve Smith a vawm out hmain captain Rohit Sharma nen an inbia a, he ta an thusawi hi Indian batsman Rohit Sharma chuan a sawi chhuak. Mumbai captain chuan, "Steve Smith kha ball rang tak pek loh kha kan tum ber chu a ni a, bowler-te tlan dan thlir chungin thiam takin a bat a, kha kha venhim kan tum ber chu a ni," a ti.
Sharma chuan sawi chhunzawmin, "Mitchell hian thli thaw hawi loh lam zawngin ball a vawm a, chumi chu Steve Smith bum nana hman kha kan tum a ni," tiin Smith an vawm out dan a sawi.
A hlu vek
Mumbai Indians-in 2013 leh 2015-ah te IPL nomawi an chawi tawh a, tun season-ah chawi lehin heng season pathumah te hian Rohit Sharma hi Mumbai Indians tan captain a ni vek.
Kum 30-a upa batsman chuan, "Ka nomawi chawi tawhte hi an hlut dan a in ang vek a, sawichhuah tur bik a awm lo. Ka ngaihdanah chuan tournament ṭan hmaa kan inbuatsaih dan hi a pawimawh ber a, a bul kan ṭan fuh chuan champion a hnai kuarh tawh ṭhin," tiin season thum a champion theih chhan a sawi.