Cavs hnehtu Celtics beiseina a nung
Boston Celtics chuan NBA Finals khelh an beiseina thi hman ṭep ti nung turin nimin zing khan Cleveland Cavaliers 108-111 in an hneh. Celtics hi Eastern Conference Finals-a an match hmasa pahnihah an chak loh avangin Cavs lamin series-ah 2-1 in hma an la hruai. Nilaini zing dar 6:00-ah Game 4 an khel leh ang.
Quicken Loans Arena-a inkhelah Cavs hian point 21 zetin hma an hruai fal thei. Mahse, thi leh dam kara leng Celtics hian zawi zawiin an pawtthla zel a, second 0.1 chauh a awm tawh tihah Celtis tan Avery Bradley-a'n three points vawm lutin a team hnehna a chanpui.
NBA champion lai hian kumin playoff an match hmasa 13-ah hnehna an chang thei a, an record chhawn nun duh hle mah se an thiampuipa LeBron James-a'n point 11 chiah neiin nidang a phak lo, playoff match a khelh tawh zawng zawnga point a score tlem ber ṭum a tawng - Cavs hian an mahni court-ah ngei an beisei ang result an nei thei lo a ni.
Celtics coach Brad Stevens chuan, "Pathian vang chauh a ni. Game 2-ah khan point 22 zetin kan chak lo a, Eastern finals history-a inhneh chian ber ṭum kan tawng. Kan chak loh aṭanga kan match leh hmasa berah hnehna kan chang nghal mai thei hi a makin a ropui a ni," tiin a sawi.