Champions League-ah Liverpool an kir Arsenal tan 'Change = Europa League'

English club zinga Cham­pions League nomawi chawi ngun ber Liverpool chuan sea­son tharah 'an awmna' ṭhin Europe-a club ṭhate inelna huangah an hmel an lan ve leh dawn ta - Reds hian Pathianni zan khan Middlesbrough chu 3-0 in an sawp a, palina nichungin season an khar.

Manchester City-in season thara Champions League khel turin harsatna an tawk lo - an mikhualna ramah Watford chu 5-0 ngawtin an sawp a, pathumna an nichiang.

Arsenal fan-ten 'change' an hmuh duh thu season tluanin tlangaupui mah se an 'change' hmuh erawh an beisei loh zawk a ni - Everton chu 3-1 in hneh mah se season 19 chhung zet a zawna Champions League an khelh hnuah pangana nichungin season an khar a, season tharah chuan Europa League an khel dawn.

Boruak sang chu

Pathianni zan dar 7:30-a ni a, Champions League khel thei dinhmuna ding Manchester City, Liverpool leh Arsenal a rualin an inlan vek. Minute 30 a nih meuh chuan City-in Vincent Kompany leh Sergio Aguero goal hnih hmangin Watford lakah 3-0 in hma an hruai tawh a, pathumna an nichiang tawha ngaih a ni.

Emirates Stadium-a Arsenal leh Everton inkhelah Laurent Koscielny chu minute 14-na lekah hnawhchhuah ni mah se Hector Bellerin leh Alexis Sanchez ten hma takah goal an khung avangin minute 30-a Gunners hmahruaina chu 2-0 a ni. Anfield-a Boro mikhualtu Liverpool-in goal an la khung ve lo a, minute 30-naah inkhel tawp se chu City leh Arsenal-in Champions League an khel ang a, Liverpool-in pangana nichungin season an khar ang - boruak a sang hle.

Hei le Liverpool

Reds fan-ten inkhel leh­lamah team pahnihin goal an khung tawh tih an hria a, an team-in an la khung ve si lo - thinphu a rang. Mahse, first half hun pek belhah Georginio Wijnaldum a inlar a, Dutch midfielder hian Reds hmahruaina goal a khung. Anfield a nghing em ni? tih tur khawpin thawm a ṭha a, Liverpool fan-ten Champions League an mitthla nghal.

Jurgen Klopp-a nauten duhtawk mai an tum lo. Philippe Coutinho chuan minute 51-naah freekick aṭangin an goal hnihna a khung a, minute nga hnuah Adam Lallana-a'n a khung ve leh bawk - Reds-in 2005 a khawvel 'thil mak' an lo thlentir tawhna Champions League an khel leh dawn tih a chiang tawh a, Anfield lamah chuan a lawmna an ṭan der tawh.

FA Cup lamah

Manchester City-in Watford lakah goal thum an khung hnuin Fernandinho leh Gabriel Jesus hmangin goal hnih an khung leh a, minute 60-naa an dinhmun chu 5-0 a ni. Emirates Stadium lamah Everton-in Romelu Lukaku penalty hmangin minute 58-naah an si phurh an sut ṭhen a, Arsenal dinhmun a chhe hle.

City an chak dawn tih a chiang tawh a, Reds-in Boro lakah goal thum an khung tawh bawk - minute 60 a nih meuh chuan Gunners tan beisei tur a awm tawh lo. Arsene Wenger pawhin 'chance' an nei tawh lo tih a hai lo - May 27 a Chelsea nen FA Cup final an khelh tur lam a thlir a, minute 67-naah a player chhuanvawr Alexis Sanchez a la chhuak. Gunners-in goal khung erawh an ṭhulh chuang lo a, injury time-ah Aaron Ram­sey chuan goal 'mawi' bik a khung.

Arsenal hian Wembley Sta­dium-a Blues an hmachhawn hun­ah Koscielny chu hrem vangin an chhawr thei dawn lo a, French defender hi match thum hrem tur a nih avangin season ṭantirh match hmasa pahnih a awl bawk ang.

Hello Champions League!

Liverpool manager Jurgen Klopp chuan, "Zanin kan inkhel kha tun season-a kan game pawimawh ber a nih avangin pressure pawh a sang a, mah se Liverpool kan nih miau avangin kan hna kan hlen. Liverpool ang club hi chuan Champions League kan khelh ngei hi a ṭul a ni. Ka naute ka chhuang a, kan thawkrim a, tunah chuan kan beisei ram kan hnaih deuh deuh zel a ni," tiin Reds hma hun êng takin a thlir.

City boss Pep Guardiola chuan, "Manchester United leh Arsenal te anga Europe-a hun rei tak lo hmang tawh kan ni lo. Champions League-ah hi chuan kum ruk vel leka upa kan ni a, mah se kan tum ram kan hnaih ve zel. Ka naute hi player ka enkawl tawh a zawnga kaihhruai nuam ber an ni a, an beidawng ve ngai lo. An zinga ka thawk thei hi ka hlim a ni," a ti.

A harsa a ni

Arsenal boss Arsene Wenger chuan, "Dodalna tinreng karah kan khel a, he team mai bakah keima mimal tak tan pawh a harsa a ni. Mahse, ka naute erawh an beidawng ve ngai lo a, tun hnai thla hnih chhung khan team ṭha tak kan nihzia pholangin an khel ṭha ṭhin em em a ni," a ti.

Wenger chuan sawi chhun­zawmin, "He club tan hian nitinin ka theihna zawng zawng ka pe ṭhin a, Arsenal ka hmangaihnaah hi chuan min ringhlel thei lo ang. He hmuna cham tur hian khawvela club ṭha tak tak ka lo hnar tawh a ni," a ti a, tun hnaia Gunners fan-ten an duh lohna thu an tlangaupui chu na a ti hle.

Inkhel Results
Chelsea 5 - 1 Sunderland
CHE : Willian 8'; Hazard 61'; Pedro 77'; Batshuayi 90', 90+2'
SUN : Manquillo 3'
Hull City 1 - 7 Tottenham Hotspur
HULL : Clucas 66'
TOT : Kane 11', 13', 72'; Alli 45'; Wanyama 69'; Davies 84'; Alderweireld 87'
Watford 0 - 5 Manchester City
MAN : Kompany 5'; Aguero 23', 36'; Fernandinho 41'; Gabriel Jesus 58'
Liverpool 3 - 0 Middlesbrough
LIV : Wijnaldum 45'; Philippe Coutinho 51'; Lallana 56'
Arsenal 3 - 1 Everton
ARS : Bellerín 8'; Sánchez 27'; Ramsey 90'
EVE : Lukaku 58' (P)
Manchester United 2 - 0 Crystal Palace
MAN : Harrop 15'; Pogba 19'
Burnley 1 - 2 West Ham
BUR : Vokes 23'
WES : Feghouli 27'; Ayew 72'
Leicester City 1 - 1 AFC Bournemouth
LEI : Vardy 51'
BOU : Stanislas 1'
Southampton 0 - 1 Stoke City
STO : Crouch 60'
Swansea City 2 - 1 West Brom
SWA : Ayew 72'; Llorente 86'
WES : Evans
Team Dinhmun
# Team Pld W D L GF GA GD Pts
1 Chelsea 38 30 3 5 85 33 52 93
2 Tottenham Hotspur 38 26 8 4 86 26 60 86
3 Manchester City 38 23 9 6 80 39 41 78
4 Liverpool 38 22 10 6 78 42 36 76
5 Arsenal 38 23 6 9 77 44 33 75
6 Manchester United 38 18 15 5 54 29 25 69
7 Everton 38 17 10 11 62 44 18 61
8 Southampton 38 12 10 16 41 48 -7 46
9 AFC Bournemouth 38 12 10 16 55 67 -12 46
10 West Brom 38 12 9 17 43 51 -8 45
11 West Ham United 38 12 9 17 47 64 -17 45
12 Leicester City 38 12 8 18 48 63 -15 44
13 Stoke City 38 11 11 16 41 56 -15 44
14 Crystal Palace 38 12 5 21 50 63 -13 41
15 Swansea City 38 12 5 21 45 70 -25 41
16 Burnley 38 11 7 20 39 55 -16 40
17 Watford 38 11 7 20 40 68 -28 40
18 Hull City 38 9 7 22 37 80 -43 34
19 Middlesbrough 38 5 13 20 27 53 -26 28
20 Sunderland 38 6 6 26 29 69 -40 24