Keeper ṭha ber Courtois

Chelsea goalkeeper Thibaut Courtois hnenah Premier League Golden Glove hlan a ni. Courtois hian he chawimawina dawng tur hian clean sheets vawi 16 a nei.

Blues keeper zingah Courtois hi Golden Glove dawng thei pahnihna a ni, Petr Cech chuan he lawmman hi Stamford Bridge-ah ṭum hnih a lo hawn tawh a ni.

Kum 25-a upa Cour­tois hnungah hian Hugo Lloris a awm. Tottenaham-in an match hnuhung bera Hull City an hneh ṭumin goal chhuah lo ni se Lloris hian Courtois a tluk chiah ang, mahse goal khat a chhuah avangin clean sheets vawi 15 a neih tawh chu a belh thei lo.

Belgium international Courtois chuan, "Premier League te ang league ropui a hetiang lawmman ka dawng thei hi ka lawmin ka chhuang hle. Chawimawina hi mahni maia dawn theih a ni lo, ball ka dan tam tak a awm nachungin ka ṭhianten goal ven kawngah min puih ṭhat vang a ni," tiin a sawi.