Bengaluru kutah Federation Cup
Bengaluru FC-in I League-ah Aizawl FC lakah nomawi an chân a, Blues hian Federation Cup-ah Mohun Bagan aṭangin champion nomawi an chhuhsak thung.
Pathianni zan khan Barabati Stadium, Cuttack-ah Fed Cup final khelh a ni a, hun pangngaiah goal a lut lo. Extra time-ah CK Vineeth-a'n goal hnih a khung a, Bengaluru FC 2-0 in hnehna an chang.
Kum 2013-a din Blues hi Indian football-a season li an khelh chhung lekin I League leh Fed Cup-ah vawi hnih ve ve an champion tawh.
Rinkai Bagan?
Champion lai Mohun Bagan-in Nilaini khan AFC Cup-ah Bengaluru FC 3-1 in an hneh a, hemi ṭuma goal hmahruai khungtu Jeje Lalpekhlua chu bench-a ṭhuttir thei khawpin coach Sanjoy Sen-a'n player a nei ṭha.
Bengaluru FC lamin captain Sunil Chhetri leh midfielder pawimawh Cameron Watson-te an chhawr thei lo.
Goal a lut lo
Bengaluru FC-in bul an ṭan ṭha hret a, minute 20-naa an goal khung chu offside vangin pawm a ni lo. Bagan keeper Debjit Majumder-a'n goal a venghim ṭha a, darkar chanve hnuah Kolkata club tan defender Eduardo Ferreira-a'n crossbar a tauh per bawk.
Sanjoy Sen-a hoten ball an chang tam chho a, goal hmuh tur a awm loh avangin minute 63-naah Jeje-a luhtir a ni. Amaherawhchu, season liam taa best player leh top scorer ni kawp thei Mizo tlangvalin goal a keng tel bik lo - hun tawp dawnah uiawm takin vawi hnih a hlah.
A hunah CK Vineeth
Extra time minute 107-naah CK Vineeth-a'n box pawnah chiah ball per chang fuhin a insiamrem hnuah goal-ah petin Bagan defender Anas Edathodika a per avangin keeper Debjit tan theih a ni lo.
Minute riat hnuah CK Vineeth bawkin goal a khung a, Bagan tan tawhchhuah ngaihna a awm tawh lo.
Goal khung tam Danmawia
Fed Cup-ah hian match 15 khelh a ni a, goal lut zat chu goal 44 a ni. Mizo tlangval R. Laldanmawia'n Aizawl FC tan goal thum a khung. Sialhawk tlangval khung zat chiah hi Bagan forward Darryl Duffy leh Balwant Singh ten an khung ve bawk.
Inelnaah hian best player thlan a ni a, Bagan player pawimawh Sony Norde chuan mimal ṭha ber chawimawina hi a dawng.