Serie A champion Juventus
Juventus chuan a zawnin Serie A nomawi vawi ruk an chawi ta. Turin club hian Pathianni zan khan Mario Mandzukic, Paulo Dybala leh Alex Sandro te goal hmangin Crotone 3-0 in an hneh, inkhelh hmabak pakhat la nei mah se pahnihna AS Roma tan umphak theih an ni tawh lo.
Kar hmasa khan Massimiliano Allegri naute hian Lazio 2-0 a hnehin Coppa Italia nomawi an chawi tawh a, Champions League final-ah Real Madrid nen an la inhmachhawn dawn bawk.
June 3 khian Cardiff-ah Juve hian Real Madrid an hneh a nih chuan Jose Mourinho-a enkawl Inter Milan-in kum 2010-a treble champion an nih hnuah Italian club zinga season khat chhunga nomawi lian pathum chawi leh thei hmasa ber an ni ang.
Turin club hian league match 37 khelh tawhah vawi 28 hnehna an chang a, vawi nga chak lo zawkah ṭangin ṭum li dang chu an khingpuite nen an inhnehtawk - point 88 hmuin an hnuai chiaha awm Roma chuan point 84 an hmu thung.
Allegri thukhawchang
Kum 49-a upa Allgeri chuan, "Ka naute hian fak an phu, season tluanin rim takin an thawk a, a tawpah nomawi kan chawi thei leh ta. A zawna champion hnem record kan siam thei hi a lawmawm a, team ṭha tak kan din theih nana mi pawimawh club thuneitute chungah pawh ka lawm hle," tiin a sawi. Allgeri hian kum thum chhungin Juventus hi nomawi pasarih ngawt a chawi pui tawh a ni.
Italian manager-in nomawi an chawi zawh hnua a zawhna dawn hnem tak pakhat chu a hmalam hun a ni! Allegri chuan, "He hmunah hian ka hlim, tuna kan thlen chin hi a sang tawh em em a, hetiang renga ṭha a kal hi thil awlsam a ni lo," a ti.
Allegri chuan sawi chhunzawmin, "A bik takin tun hnai thla nga chhungin kan thawkrim zual hle a, tunah chuan hun rei lote chhung atan kan chawl phawt ang. Chumi hnuah Champions League final khel turin an inpuahchah ang, hma lam hun sawi a remchang rih lo," tiin Turin-ah a cham chhunzawm dawn leh dawn loh a sawi chiang duh rih lo.
Juve veteran goalkeeper Gianluigi Buffon chuan tun hnaia Juventus-in Italian football an thunun dan chu ṭhangtharte thlenga an la sawi zui tur khawpa ropui a nih thu a sawi ve bawk.
Inter an chak
A zawna league match vawi riat chhung chak ni hmel hmu tawh lo Inter Milan chuan hnehna an chang ve leh ta. Inter hian goal an phurh hmasak zet hnuah Lazio chu 3-1 in an lehthal. Inter-in point 59 an hmu ta a, league table-ah pasarihna an ni - an chunga awm AC Milan aiin point li a an hniam zawk avangin Europa League an khel phak tawh dawn lo tih a chiang.
Team Dinhmun
# Team MP W D L GF GA GD Pts
1 Juventus 37 28 4 5 75 26 49 88
2 Roma 37 27 3 7 87 36 51 84
3 Napoli 37 25 8 4 90 37 53 83
4 Lazio 37 21 7 9 73 48 25 70
5 Atalanta 37 20 9 8 61 41 20 69
6 AC Milan 37 18 9 10 56 43 13 63
7 Inter Milan 37 18 5 14 67 47 20 59
8 Fiorentina 37 16 11 10 61 55 6 59
9 Torino 37 12 14 11 66 63 3 50
10 Sampdoria 37 12 12 13 47 51 -4 48
11 Sassuolo 37 13 7 17 55 58 -3 46
12 Udinese 37 12 9 16 45 51 -6 45
13 Cagliari 37 13 5 19 53 75 -22 44
14 Chievo 37 12 7 18 43 60 -17 43
15 Bologna 37 11 8 18 39 56 -17 41
16 Genoa 37 9 9 19 36 61 -25 36
17 Empoli 37 8 8 21 28 59 -31 32
18 Crotone 37 8 7 22 31 57 -26 31
19 Palermo 36 5 8 23 31 74 -43 23
20 Pescara 36 2 8 26 33 79 -46 14