Barcelona-ah Robert Lewandowski a lut ta

Nipui transfer-a thawm ri ret ret reng kha a chiang ta e - Robert Lewandowski chu Barcelona player a ni ta a, European striker 'hot' bera chhal ngam hian season tharah chuan Catalan club tan a khel tawh dawn.

Barcelona hian Bayern Munich striker chhuanvawr la tur hian pound maktaduai 42.6 an inseng a, kum li chhung atan contract an ziahpui - a lei chhuak duh tan pound maktaduai 425.9 an insen a ngai ang!

Kum 33 mi Lewy chuan, "A tawpah chuan Barca ka zawm thei ta a, he hmuna ka awm thei hi ka lawm takzet a ni," a ti a, Catalan club a zawm thei chu a hlim thu a sawi.

Barcelona hian USA-ah pre-season tour an nei mek a, Lewy hian US-ah a team thar hi a zawm nghal - Barca fan-ten season thar an nghakhlel tawh khawp ang.

Chona thar
Bayern fan-ten Lewy an atchilh rawn a, German club-ah nomawi chawi theih ang chu a chawi kim. Mahse, Polish striker hian chona thar hmachhawn a duh a, May thla khan, "Bayern-a ka thawnthu chu a tawp tawh," tiin chhuah a duh thu a sawi.

Club tam takin duh mah se, leiba neih vanga talbuai Barcelona pawh an lo lang ve vat a, Lewy hian Catalan club hi a thlang chat - Bayern-in chhuahtir an tum loh avangin rei tak an indawr a, a tawpah a fel ta.

Lewy chuan, "Indawr chhung a rei hle - mahse, tunah chuan engkim a fel tawh a, ka nuna chona thar hmachhawn turin ka inbuatsaih thei tawh dawn a ni," a ti.

Poland tan vawi 132 inlana goal 76 khung thei Lewandowski hian kar khatah £150,000 (Rs. 1,43,82,219.74) a hlawh dawn nia sawi a ni a, hei hi chhiah chawi ngai leh thil danga 'cut' ngaite tihfel vek hnuah a ni - Bayern-a a hlawh aiin 25% in a hniam niin Spanish media te chuan an tarlang.

Nomawi beiseina
Lewandowski hian Borussia Dortmund tana a khelh laiin Bundesliga (2), DFB-Pokal leh DFL-Supercup-ah champion nomawi a chawi a, kum 2014-a Bayern a pan hnuah a hlawhtling lehzual.

Poland international hian Bayern-ah season riat hun a hmang a, Bundesliga nomawi vawi riat a chawi! Chu chauh a ni lo - a la champion ngai lohna Champions League-ah a champion a, DFB-Pokal (3), DFL-Supercup (5), UEFA Super Cup (1) leh FIFA Club World Cup (1) ah te champion nomawi a chawipui bawk.

Lewy hian Barca-ah hlawhtlin chhunzawm a inbeisei a, nomawi chawi tura Nou Camp pan a nih thu a sawi. Polish striker chuan, "La Liga-a club lian tana khelh hi ka châk fo ṭhin.

"Barca hian dinhmun sang ber an luah leh theih nan he hmun hi ka rawn pan a, nomawi tam tak chawi ka duh a ni," a ti a, a kalna apianga hlawhtling ṭhin striker hi a ṭawng huai hle.

A hming Lewy
Bayern-a Lewandowski sulhnu hi a ropui hle - German club tan hian match 374 khelhsakin goal 344 a khung a, assist vawi 72 a nei. Bayern tana goal khung hnem lamah Gerd Müller (523 goals) chiah a tluk lo.

Lewy hian Bayern tana a khelh hmasak ber season-ah goal 25 a khung a, hemi hnuah hian season khata goal 40 aia khung tlem a nei ngai lo - uanpui tham sulhnu a hnutchhiah.

Season hman zawh takah pawh khan inelna hrang hrangah match 46 khelin goal 50 a khung a, La Liga club defender-ten Lewy hmachhawn hi an châk lo ang tih a chiang.

Barcelona-in Lewandowski an lakluh ruala thil lang chiang tak pakhat chu Real Madrid nen an boruak a sang leh dawn tih hi a ni a, season thar a nghahhlelhawm ta hle.

A mak tiraw?
Barcelona-in Lewy an lakluh ruala zawhna lo awm erawh, leiba vanga talbuai a, an pathian ang maia an en, Lionel Messi meuh pawh chhuahtu Barcelona hian khawi aṭangin nge pawisa an neih? tih hi a ni.

August 2021 khan club president Joan Laporta chuan leiba pound tluklehdingawn 1.15 an neih thu a sawi a, Catalan club hian tlakchhiat lam an pan ngei tura ngaihna a lian hle.

Mahse, tun nipuiah ringawt pawh player langsar ṭhiau pali an lalut tawh - Lewy hma hian midfielder Franck Kessie leh defender Andreas Christensen te chu free transfer-in an lalut tawh.

Chu chauh a ni lo - Leeds United aṭangin Raphinha chu pound maktaduai 55 thlenga sang chho thei turin an la bawk a, Lewy manah £42.6mtd an theh chhuak bawk!

Engtin nge an tih?
Barca hian player an lakluh pali zinga pahnih hi free transfer-in lalut mah se player pahnih theihna enin an hlawh a tlem thei lo tih a chiang a, man to taka an lei pahnih pawh an hlawh a tlem lo.

Hetihlai hian nipui transfer-a a contract a hman zawh avanga chhuak tur ang sawi thawm awm reng Ousmane Dembele pawh Barcelona hian chelhin, contract thar an pe bawk!

Sum nei lo, leiba ngahin heti taka sum an seng thei hi he luikam aṭang hian a ṭhen pawh hriat a har - Bayern boss Julian Nagelsmann pawh a buai ve tho a, Barca chet dan mak a tih thu a sawi.

Nagelsmann chuan, "Khawvel club zingah Barca hi pawisa nei loa player lei thei awmchhun an ni. Ka tan chuan thil mak leh danglam tak a ni a, mahse, a tawpah an inrem ta - mahse, engtinnge a thlen theih ka hre lo," a ti!

A hrilhfiahna
Barca-in tlarhmaah Pierre-Emerick Aubameyang, Ousmane Dembele, Ansu Fati, Ferran Torres leh Memphis Depay an nei chungin Lewy an lei belh a, leiba nei tam chetin an che tlat lo. Mahse, Catalan club hian an club tluchhe mek dinthar turin tunah 'risk' an la a ni ber.

La Liga club hian Barca Licensing and Merchandising company-a share 49.9% chu hralh an tum a, mahse, Laporta chuan he share hi an hralh pawhin lei letna dan an neih tur thu a sawi. BLM share hi pound maktaduai 200 vela hralh theih an inbeisei.

Hei chauh a ni lo - American investment firm Sixth Street Partners hnenah kum 25 chhung atana an TV rights 10% chu £175mtd hralh turin inremna an nei tawh. Barca hian TV rights hi 10% dang, kum 25 atan tho hralh leh an tum bawk a, season thara stadium-a inkhelh enna man an hisap bawk - a tawi zawnga sawi chuan Barca hian tun hun atan an hma huna an sum lakluh tur an lo 'risk' lawk a, an tihsual chuan a sawp a na viau ang!

Catalan club hian audio streaming platform Spotify nen kum li chhung thawk dun turin pound maktaduai 280 velin inremna an nei tih erawh theihnghilhsak loh a ṭha - mahse, pawisa hi season tina inpek zel tur a ni a, a vai hian an dawng nghal lo ang.

Barca an chak
Xavi enkawl Barcelona hian USA-ah pre-season tour an nei mek a, nimin khan Major League Soccer club Inter Miami chu 6-0 ngawtin an sawp - Miami hi David Beckham-a club a ni.

Catalan club tan Aubameyang, Raphinha, Fati, Gavi, Depay leh Dembele te chuan goal khat ṭheuh an khung a, Gonzalo Higuaín khelhna Inter Miami-in a chhanletna tur an nei lo.

DRV PNK Stadium, Miami-a inkhelah hian Barca tana a match hmasa ber kheltu Raphinha chuan goal a khung bakah assist vawi hnih a nei a, he inkhelah hian Beckham-a fapa, Inter Miami reserve team tana khel Romeo Bekcham chu minute nga a inlan ve a, coach Phil Neville-a fapa Harvey Neville pawh a inlan ve bawk.

Barca hian Real Madrid (July 24), Juventus (July 27), New York Red Bulls (July 31) te chu US-ah hian an inkhelhpui leh ang a, Spain-ah kir lehin, Mexican club Pumas UNAM (August 7) leh Manchester City (August 24) te an hmachhawn ang a, August 28 zanah Real Valladolid nen season thara an league match hmasa ber an khel ang.