Canadian Open khel tur zingah Djokovic

Novak Djokovic chu Canadian Open khel tur zingah a hming a tel. Serbian star hian Covid 19 laka invenna damdawi a la ve lo a, hei vang hian tournament hmachhawn turin a zin lut thei dawn em, tih erawh a la chiang chuang lo.

August thlaa khelh tur Western and Southern Open-ah hian Serena Williams pawh a inlan dawn a, Grand Slam vawi 23 champion tawh hian 2014 leh 2015 khan he hmunah hian hlawhtlinna a lo chang tawh a, US Open inbuatsaihna atan a pawimawh ang.

Tuna United States inkaih-hruaina danah chuan, pawn lam mi an rama zin lut tur tan chuan hripui laka invenna lak a ngai. Djokovic tan thil a awlsam dawn lo, an ram inkaihhruaina dan hi tun hnaiah an thlak a nih loh chuan US Open pawh a khel thei dawn lo.

Wimbledon champion hlui Djokovic chuan, "Theih ni se chuan US Open khelh ka duh, a theih ngang lo a nih pawhin khawvel tawpna tur a la ni lo, a hma pawhin Grand Slam khelh theih loh ka nei tawh," tiin a lo sawi tawh a, vaccine lak tumna a la nei chuang lo a ni.

Djokovic bakah hian Rafael Nadal pawhin hard court inelna hi hmachhawn a tum. French Open khelh laia hliam Alexander Zverev a dam ṭan tawh a, ani pawh hian Canadian Open khelh a tum - Grigor Dimitrov leh Marin Cilic te hming tarlan a ni bawk.