Bayern defender thar De Ligt

Bayern Munich chuan tlarhnung thuam chak nan Matthijs de Ligt an lalut. Netherlands international hi Juventus aṭangin pound makatduai 65.6 zetin an lei a, an club player man tam pahnihna a ni hial.

De Ligt hian Allianz Arena-ah season nga cham turin contract hi a ziak. Bavarians hian tun nipui bazar chhungin Sadio Mane an lalut tawh bawk a, tlarhnung leh a hma lama chhawr tur player hrawl an lalut.

Mahse, De Ligt leh Mane an neih belh lai hian, an striker ṭha leh thiampuipa ni bawk Robert Lewandowski erawhin Barcelona a pan san thung; season tharah Bayer Munich hmel thar kan hmu dawn.

Dutch defender De Ligt hian mi hriat a hlawh hma, kum naupangte ni chungin Ajax captain a ni thei. Ajax aṭangin 2019 khan Juventus a zawm. Turin club tan hian season hnih daih contract la nei mah se, chona thar hmachhawn tura Bayen zawm a thlang.

Italian club tan De Ligt-a'n inelna hrang hrangah match 117 a khel hman a, Serie A leh Coppa Italia nomawi a chawipui. Theihna sang tak nei mi mah se a kum a la naupang a, a tira an beisei ang tak erawh chuan an chhawr rim tawk lo deuh.

Kum 22 mi De Ligt chuan, "Germany ramah chuan Bayern Munich hi club hlawhtling ber an ni. Europe khawmualpui leh khawvel huapa kan teh a nih pawhin, club hlawhtling berte zinga mi a ni phak. Club ropui tak ka zawm thei hi ka lawm.

"Club neitu lamin min bia a, hmathlir thui tak an neihzia ka hria. Coach pawhin a ruahmanna leh hmathlir min hrilh bawk, thil tum sang tak nei leh hmasawn duh club an ni tih ka hria," tiin German champion a zawm chhan a sawi.

Bayern Munich player man to ber chu Lucas Hernandez niin, kum 2019 khan France international hian Atletico Madrid aṭangin Bayern hi a zawm, a man zat chu pound maktaduai 68 lai a ni - Hernandez leh De Ligt te hi an khel dun ang.

Bayern Munich CEO Oliver Kahn chuan, "Tlarhma chak ṭha tak kan nei tawh a, a hnung lam thuam chak nen Matthijs kan lalut thei hi a lawmawm," a ti. Sporting director Hasan Salihamidzic pawhin De Ligt chu kum thum liam ta aṭanga lakluh an tum a nih thu a sawi ve bawk.

Salihamidzic chuan, "Ajax captain a ni thei a, khatih lai khan kum 20 bawr chauh a la ni. A kum naupan anga teh chi a ni lo, a puitlingin hruaitu ṭha tak a ni tel bawk. Bayern tan mi pawimawh tak a ni ang," tiin a sawi.