United fan-ten Harry Maguire an au el

Manchester United captain Harry Maguire chu Crystal Palace nena friendly match an khelhnaah Red Devils fans ṭhenkhatin an au el a, mangchhiain English defender a kiansan thei lo.

Red Devils hian Thawhlehni zan khan Melbourne Cricket Ground-ah Crystal Palace nen friendly match an khel a, mipui 76,499 hmaah United hi 3-1 in chak mah se Maguire tan erawh zan theihnghilh tlak a ni.

England international hi ball a tawh fuh apiangin fans ṭhenkhatin an lo au el a, khawvela defender man to ber hi an club tana khel chhunzawm zel turin an duh lo.

United hian Australia-ah pre-season match khat khelh tur an la nei a, Maguire hian fan-te auh elna a tawk chhunzawm ang em, tih chu zawhna awm thei tak a ni.

Captain Fantastic...lo deuh!
August 2019 khan Maguire hian pound maktaduai 80-in United hi a zawm a, January 2020 khan khatihlaia Red Devils manager Ole Gunnar Solskjær chuan captain atan a ruat.

Mahse, Maguire hian Leicester City-a a khelh angin United tan a khel hleithei lo a, chetsualna a neih ngun hnu phei chuan fan-te en bik a hlawh a, a chetsual an chang reng em ni chu aw, tih mai tur a ni.

United-in coach thar atana Erik ten Hag an lakluh khan fans tam takin thutlukna langsar tak tak siam turin an beisei a, Maguire duh lotute chuan a captain zui an ring lo.

Mahse, Dutch coach hian Maguire a captain zui tur thu a sawi a, nipui transfer-a lakluh thar, £57mtd man Lisandro Martinez nen a laiah inkawptir a tum.

An duh lo
Maguire tan tun hi United fan-te lak aṭanga beihna a tawh vawi khatna a ni lo - season hmasa khan beisei a phak loh avangin a chhungte nen vau a lo tawk tawh a, Police lamin a in leh a vel an en dik a ngai hial.

United midfielder Donny van de Beek chuan, "Eng thil nge thleng kha ka hrethiam lo a, mahse, inkhel kan en chuan Harry kha a khel ṭha hlein ka hria," a ti a, a ṭhianpain beih a tawk chu a hrethiam lo.

England tan vawi 46 inlana goal sarih khung thei Maguire hian United a pan hnuah match 144 khelin goal sarih a khung a, assist vawi nga a nei a, nomawi chawi loin a la awm mek.

Maguire hi March thla khan England fan-te pawhin an lo au el tawh - chutihrual chuan Maguire hi United inkhelh zawhah fans tam takin an bawr tho a, United fans zawng zawngin an haw lo.

Chanchin lawmawm
United tana chanchin lawmawm erawh pre-season match an khelhah an la chak vek - match hmasa berah 4-0 in Liverpool an sawp a, Melbourne Victory chu 4-1 in an hneh a, Palace chu 3-1 in an hneh leh ta.

United tan hian Anthony Martial, Marcus Rashford leh Jadon Sancho ten goal khat ṭheuh an khung a, Palace tana Joel Ward goal khungin awmzia a nei phak lo - hetihlai hian United centre back, kum 19 mi Will Fish chu Victor Akinwale laka a foul avangin hnawhchhuah a ni thung.

Red Devils lawmna turin Martial-a'n goal a khung leh tawh a, French striker hian pre-season tour-a match thum an khelh tawhah goal a la khung vek. Palace lakah hian goal a khung bakah Sancho goal khung tur a siamsak bawk.

United hian July 23-ah Aston Villa nen Perth-ah friendly match an khel leh ang a, Norway-ah Atletico Madrid (July 30) hmachhawn zuiin Old Trafford-ah Rayo Vallecano (July 31) an mikhual leh ang a, pre-season an khar ang - August 7 zanah Brighton & Hove Albion nen season thara an league match hmasa ber chu an khel dawn a ni.

Ronaldo buaina
United squad-ah chhuah duh Cristiano Ronaldo a la awm lo zel a, Portuguese forward hian season tharah Champions League khelh duh mah se European top club zingah Ronaldo duhtu an awm lo nia sawi a ni!

Kum 37 mi Ronaldo hi Atletico Madrid nen tun hnaiah sawi zawm a ni a, mahse, tlarhnung ngaipawimawhtu Diego Simeone nen an khelh duh dan a inrem an ring lo a, Atletico hian a hlawh zat an pek theih a rinawm chiah lo bawk - Real hmelma kumhlun an ni tih hre bawk ila.

United boss Erik ten Hag chuan Ronaldo hi chhuahtir a tum loh thu a sawi tawh a, mahse, engmah a la chiang lo. Ronaldo-a'n season hmasaa United a zawm dawn khan transfer khar nan ni li chauh a awm tawh tihah Juventus a chhuahsan thut a, hawtu a ngah hle.

Khatihlaia Juve captain Giorgio Chiellini chuan, "Chhuak hma se kan ṭhatpui zawk ang," tiin Ronaldo-a chhuak duhin club a tihbuai thu a sawi a, bul an ṭan ṭhat loh phahah a ngai - United tan âtthlak taka chelh reng ai chuan a chhuahna tur ngaihvenpui a fuh mai thei!