Chawlhna hun a awm lo - Sindhu

PV Sindhu chuan Singapore Open nomawi chawi zo hlim ni mah se hahchawlhna hun a neih loh thu a sawi. Birmingham Commonwealth Games khel turin inbuatsaihna a neih chhunzawm nghal a ngai.

Sindhu hian season kal laia a nomawi pathumna atan Singapore Open title a la a, nomawi chawi tur hian Asian Championships gold medallist Wang Zhi Yi chu game thum an khelh hnuah a hneh.

July 28 aṭang hian Birmingham-ah Commonwealth Games neih a ni dawn, he infiamna khawmpui lianah hian India aiawhin Sindhu hi a inlan dawn a ni a, medal hlawh chhuak tur chuan inbuatsaihna neih ṭhat a ngai.

World number 1 hlui Sindhu chuan, "Tournament ṭhenkhatah chuan theihtawp kan chhuah chung pawhin kan thleng sang ngai lo, ṭhenkhatah chuan ṭha taka khel chungin quarterfinal bawr vela tlak chang pawh a awm.

Inelna ṭhenkhatah erawh a ṭha ber ni lo chunga champion chang a awm ve bawk. Kan tih theih pawimawh hmasa chu inbuatsaihna neih ṭhat a ni. Ni dang ang chu ni se Singapore Open khelh zawh hnu hian chawlh ka nei ang, kuminah erawh Commonwealth Games avangin chawlh a awm thei lo," tiin a sawi.