Man City-in Neymar ngaihven lo

Footballer man to ber Neymar chanchin an inrinsiak nasa - Paris Saint-Germain forward hi tun hnai khan Manchester City nen sawi zawm a ni. Mahse, Pep Guardiloa chuan Neymar lakluh tumna an nei lo tih a sawi.

Barcelona forward hlui Neymar hian PSG tan contract a la nei, amaherawhchu media lamin chhuak tur angin an ziak nasa. Kylian Mbappe-a'n contract a ziah hlim phei chuan Brazil international hi chhuak tur angin thawm a ring zual hle.

Mahse, tunah chuan Lionel Messi, Mbappe leh Neymar te hian PSG tan season thar inbuatsaihna an nei mek, tunlai boruak thlir chuan anni pathum zingah hian tun transfer hun chhunga chhuak an awm a rinawm ta lo.

Man City manager Guardiola chuan, "Neymar hi player thiam leh ṭha bik a ni a, ani nena sawizawm kan ni pawh a lawmawm, thu hriat nuam tak pawh a ni, mahse kan hnena lo kal tur anga an sawi hi chu thu dik lo a ni," tiin a sawi.

Citizens hian Erling Braut Haaland an lei thar a, ani bakah hian Julian Alvarez an nei bawk. Raheem Sterling leh Gabriel Jesus te chhuak mah se, goal nawr kawngah chuan an buai chuang lo tura ngaih a ni.