Team dangte hlauh nih ka duh - Conte

Antonio Conte-a'n season thar a thlir a, a enkawl Tottenham Hotspur chu team dangte hmachhawn châk loh leh an hlauh rawn ni thei se a duh thu a sawi a, chumi tur chuan inbuatsaihna an nei mek.

Spurs hian tun nipui bazarah player paruk ngawt an lalut tawh. Defender Djed Spence, goalkeeper Fraser Forster, defender Clement Lenglet, midfielder Yves Bissouma te bakah forward Ivan Perisic leh Richarlison te an lei fel tawh.

Conte chuan, "Juventus ka enkawl tirh khan champion Inter Milan an phak lohna chu point 20 tehmeuh a ni. Season khatnaah chuan kan inkar tih zim phawt kan tum a, chumi hnuah champion tumin hma kan la. Italy-ah kha chuan champion turin team pakhat chiah el a ngai.

"Premier League erawh a boruak a danglam. Liverpool, Manchester City leh Chelsea te kan el a ngai, an chet ṭhat tawk loh kumah pawh Chelsea hian Champions League leh Club World Cup nomawi an chawi thei," a ti.

Italian manager chuan sawi zawmin, "Manchester United pawh team khawng ṭha tak an ni a, an player lakluh dan thlirin Arsenal pawh sawi hmaih an rem lo. Chuvangin season thar hi chu a hautak dawn takzet.

"Inelna a hautak chuan keini lam pawhin ṭan kan lak nasat a ngai tihna a ni mai. Theihtawp kan chhuah dawn a, club dangin an hmachawn châk loh nih kan tum tur a ni ang," tiin a sawi a, nomawi chuhtu zingah tel ngei a tum.

North London club hian striker hriam tak Harry Kane an nei sa, forward ṭha mi Son Heung-min an neih bakah tlarhma sira khel thei Richarlison an neih belh avangin an goal nawr a na tawk viau tura ngaih a ni.

Conte chuan, "Thil tum chiang tak ka nei, chu chu midangte kan elphak tur a ni. Tottenham hian team ṭha dang a elphak tur a ni a, chumi tur chuan keimah chauh ni loin player bakah club thuneitu zawng zawng kan ṭanrual a ngai bawk," a ti.

Tottenham hian English football inelna sang bera nomawi an chawi lohna a rei ta hle, an champion hnuhnung ber aṭangin kum 61 a liam tawh - a hnu lamah team 13 ngawtin league nomawi hi an chawi leh tawh.

Season thar inbuatsaih nan Spurs hian Inrinni zan dar 11:45 hian AS Roma chu friendly match an khelhpui ang.