Pathumna Chelsea tan point 3

Chelsea-in Premier League pathumna ni turin kawng dik an zawh a, Thawhlehni zan khan Norwich City 1-0 in an hneh. Blues goal awmchhun hi Olivier Giroud-a'n first half injury time-ah a khung. 

Frank Lampard-a hoten match 36 aṭangin point 63 an hmu a, palina china awm chiang tur erawhin Liverpool leh Wolverhampton Wanderers aṭangin point li tal hmuh an la mamawh. Champions League khel turin Blues dinhmun a ṭha nachungin vanduai thei an la ni.

Chelsea-in midfielder ṭha N'Golo Kante an la chhawr thei lo a, chutihrualin Sheffield United laka mualphote erawh rinlawk ang ngeiin siksawi niin player panga ngawt an thlak.

West Ham nena inhliam Mateo Kovacic-a'n bul a ṭan thei tawh a, Croatian midfielder hi Reuben Loftus-Cheek nen Jorginho thlawp turin an dah lut. Tlarhnungah Marcos Alonso leh Antonio Rudiger te dah luh an ni a, tlarhmaah Tammy Abraham aiah Olivier Giroud a lut.

Chelsea khingpui Norwich City erawh kar liam ta khan West Ham lakah 4-0 ngawtin an mualpho a, Premier League aṭanga an relegate chian tawh avangin khelh chhan pawimawh an nei lo. Stamford Bridge-ah khelh a nih bawk avangin Lampard-a hote tan hna harsa tur awmin a lang lo.

Chelsea-in rinlawk ang ngeiin inkhel an thunun a, Giroud-a'n a chance ṭha neih chu a ngal zut avangin keeper Tim Krul tan dan a harsa lo. Blues player zinga hmuhnawm ber Christian Pulisic-a'n Rudiger-a cross chu a ke ding lama la thlain a ke vei lamin a pet nghal a, Canaries keeper Krul-a'n a dang ṭha tak zet.

Blues-in goal khung an harsat a, Kurt Zouma-a'n corner aṭanga ball kal a tauh lut lo. Injury time-ah Alonso leh Pulisic ten mual vei lam aṭangin Norwich tlarhnung an ṭhiat a, American midfielder cross chu Giroud-a'n ṭha zetin a tauh lut. 

Second half-ah Chelsea-in goal tam zawk an khung a rinawm a, amaherawhchu rinlawk ang ngawt a ni lo. Mualneituin hun chanve hnu lamah goal an khung belh thei lo a, Pulisic leh Giroud te erawhin an khung teuh hle.

Frank Lampard-a'n Chelsea a enkawl ṭantirhin Giroud en kanin Tammy Abraham a ring zawk a, heti chung hian World Cup nomawi meuh chawi tawh French striker hian langsarin a lungawi loh thu a chhak chhuak lo. Hun pawimawhah tawnhriat nei tlem player an duap leh ṭhin a, Giroud hi kumin February aṭangin khelhna hun pek tam a ni. French striker hian a khat mawi tawkin goal a khung a, February aṭangin vawi riat inkhel bul ṭanin goal ruk a khung.

Chelsea manager Lampard chuan, "Khelmualah team tan a khel ṭhin a, chance a insiam a, goal pawimawh a khung. Harsatna min siam ngai lo a, ṭha takin training a nei a, a entawntlak em em a ni," tiin chakna goal khungtu a fak.

Blues boss Lampard chuan, "Season tawp lamah chuan point thum a hlu a, goal kan chhuah lo a, kan khingpuite goal khungna chance kan siamtir lo," tiin khel ṭha tawk lo mah se point thum hlu tak an hlawhchhuah thu a sawi.

Amaherawhchu Chelsea hian FA Cup semifinal-ah Manchester United an hmachhawn dawn a, Premier League-ah champion thar Liverpool leh tum châkawm lo ber zinga mi Wolverhampton te an la hmachhawn dawn. Blues khelh hmabak hi a pawimawh vek avangin season khar ṭha tur chuan insiamṭhat an mamawh takzet.

Frank Lampard chuan, "Ball kan inpek ran a ngai a, tun aiin kan khelh dan kan bel a ṭul. Hma kan la sawn thei a, chutihrualin kan chak zawh chiah avangin hmasawnna tur lam sawi thui a ṭulin ka hre rih lo," tiin point thum hmuh saktu a player-te media hmaah sawisel a tum lo.

July 14, Thawhlehni

Chelsea    1 - 0    Norwich City

CHE : Olivier Giroud 45+3'

Zanin Inkhel Tur

Everton    10:30 PM    Aston Villa

Leicester City    10:30 PM    Sheffield United

Crystal Palace    12:45 AM    Manchester United

Southampton    12:45 AM    Brighton & Hove Albion

July 17, Zirtawpni zan

West Ham United    12:30 AM    Watford