Mizoram Lockdown (inkharkhip) Ni 116

Barcelona midfielder ropui ṭhin Andrés Iniesta chanchin an sawi apiangin World Cup 2010 final-a Spain tana a goal khung kha sawi a ni ṭhin. Spain hi Netherlands nen final-ah an inkhel a, hun pangngaiah goal khung loa an inhnehtawk hnuin extra time khelh a ni. Iniesta hian minute 116-naah he inkhela goal awmchhun hi a khung a, World Cup-ah a vawi khat nan Spain a champion pui. World Cup 2018 hnuah Iniesta hian ram tana inkhelh a chawlhsan thu a puang a, Spain tan match 131-a khelhsakah goal 13-a khungsak hman. Kum 36 mi ni ve tawh midfielder hian World Cup 2010-a champion nomawi a chawi bakah hian ram tan Euro 2008 leh 2012-ah te khan 

a champion a ni. 

Barcelona academy hmingthang La Masia aṭanga inzirchhuak a ni a, 2000-01 season khan Barca B team tan a khel ṭan. Barcelona senior team tana a season hmasa ber chu 2002-03 season khan a hmang a, hetihlai hian B team tan a la khel bawk. Catalan club tan inelna hrang hrangah match 674 khelin goal 57-a khung a, La Liga (9), Copa del Rey (6), Spanish Super Cup (7), Champions League (4), UEFA Super Cup (3) leh FIFA Club World Cup (3)-ah te nomawi a chawipui. Kum 2018-ah Barcelona chhuahsanin Vissel Kobe a zawm a, Japanese club tan hian match 46 khelin goal 10 a khung leh tawh a, Emperor's Cup leh Japanese Super Cup nomawi te a chawi tawh. FIFA FIFPro World11-ah vawi kua a lang thei a, UEFA Team of the Year-ah vawi ruk a lang a, UEFA Euro Team of the Tournament-ah 2008 leh 2012-ah a lang phak bawk.