Leicester hmabak a hautak

Leicester City-in kum 2020 an hman ṭhat loh avangin Champions League khel turin chetsual a thiang tawh lo. Brendan Rodgers-a hote hian zanin dar 10:30 hian tun hnaia phur thar Sheffield United chu King Power Stadium-ah an mikhual dawn.

December thlaa champion sawi ri ngam Foxes-in kuminah hneh loh paruk an nei tawh a, vawi li chauh an la chak bawk avangin Champions League khelh pawh a harsa tawh. Leicester tana harsatna belhchhah turin Bournemouth an hneh loh ṭumin defender Caglar Soyuncu hnawhchhuah a ni a, Turkish defender hi tun season-ah a inlan dawn tawh lo. Hliam vangin player pawimawh dang pathum Marc Albrighton, Ben Chilwell leh James Maddison te dinhmun a chiang lo bawk.

Hetihlai hian Sheffield United-in an match hnuhnung pahnihah Europe khelh tum pahnih Wolves leh Chelsea te an hneh a, goal an chhuah lo ve ve. Blades lawmna belhchhah turin Championship-a champion puitu forward David McGoldrick-a'n Premier League-ah goal a khung ta a, King Power Stadium-ah pawh en bik tur zinga mi a ni.

Chutihrualin club pahnih hi an inhmachhawn hnuhnun ber ṭumin Leicester City-in Jamie Vardy leh Harvey Barnes te goal hmangin 2-1 in hnehna an chang a, Foxes inringtawkna petu a ni ang.