Zanin Europa League final Man United Vs Ajax Amsterdam

Season tharah Manchester United-in Champions League an khel dawn em tih chu zanin hian a chiang ang. Jose Mourinho hote hian zanin dar 12:15 hian Europa League final-ah Ajax Amsterdam an hmachhawn dawn.

Final khelhna tur hmun hi Sweden khawpui Stockholm a ni a, Friends Arena-a inkhel hi Ten 2-ah a en theih ang.

Ajax zin kawng
Dutch club Ajax hian Champions League playoff-ah FC Rostov 5-2 a an hneh loh avangin Europa League group stage aṭangin bul an ṭan. Russian club Rostov hi Last 16-a United hneh kha an ni.

Ajax hi Group G-ah hma­hruaitu an ni a, an awmnaah hian semifinal-a United hneh lohtu Celta Vigo an awm ve bawk. Knockout round-ah Dutch club hian Legia Warsaw (1-0), FC Copenhagen (3-2), Schalke (4-3) leh Lyon (5-4) te an hneh a, awlsam takin final an thleng lo.

United ve thung
Jose Mourinho hoten Feye­noord hneh loin bul an ṭan a, anni hi Dutch league Eredivisie-a champion an ni. Hemi hnu hian United hi insiamṭhain Group A-ah pahnihna niin knockout stage an lut.

English club hian Saint-Etienne (4-0), Rostov (2-1), Anderlecht (3-2) leh Celta Vigo (2-1) te an hneh a, Last 32-a French club awlsam taka an hneh tih loh chu inchhuanna tham khawp goal an khung lo.

Mourinho hote ṭha hret
United hian final thleng turin goal 23 an khung a, Ajax hian goal 24 khungin goal khatin an khung tam zawk. Amaherawhchu Ajax-in goal 15 an chhuah a, Amsterdam ArenA-ah result nei ṭha mah se European match-a an zinchhuah hnuhnung parukah an chak an nei lo.

United erawh Mourinho enkawl a nih miau avangin goal riat chiah an chhuah a, Dutch club aiin goal sarihin an chhuah tlem zawk.

Head to head
Club pahnih hi Europe-a vawi li an inhmachhawn tawh a, tun hi vawi nga an intawnna tur chiah a ni. An intawn hmasak ber chu 1976-77 UEFA Cup first round niin aggregate-ah United 2-1 in an chak a, inelna hming atana Europa League an vuah hnua United hmachhawn hmasak ber pawh Ajax tho an ni.

Sir Alex Ferguson-a hoin English club hian 2011-12 season khan round of 32-ah Ajax hi aggregate-ah 3-2 in an hneh leh bawk.