Player ṭha chher chhuaktu Ajax

Ajax-in an khelmual Am­sterdam ArenA chu club legend hming chawiin Johan Cruyff Stadium tiin an thlak dawn. Dutch club hian Cruyff duh dan chhawm nung zelin footballer ṭha an la chher chhuak reng a, football hmuhnawm an khel bawk.

Dutch club hian 1995 khan tun ṭuma an director of football Marc Overmars ho hian Champions League an champion tawh a, assistant manager Dennis Bergkamp pawh Ajax chherchhuah tho niin 1991-92 season khan Torino hnehin Dutch club hi UEFA Cup-ah a champion pui tawh.

Chief executive Edwin Van Der Sar hi kum 2008-a Manchester United Cham­pions League-a champion puitu kha a ni a, Dutch keeper hian kum 1990-99 chhung Ajax tan khelin UEFA Cup leh Champions League an champion ṭumin a tel ve ve.

Tun ṭuma Ajax team pawh hi 1996-a European final thleng thei team ang tho khan an naupang a, an kum hi chawhrualin kum 22 niin khawtual player ṭhahnem tak an awm bawk. Ajax team-ah hian Dutch forward Patrick Kluivert-a fapa Justin pawimawh ni phain thla thar May 5 khian kum 19 a tling chauh ang.

United tlarhnung lam tana ven uluk tur chu Ajax striker kum 19-a upa Kasper Dolberg a ni. Danish striker hian Europa League-ah goal ruk a khung tawh. Dolberg chuan, "Eng nge thleng dawn tih hi sawi lawk theih lo a, a nuam dawn tih erawh ka chiang a ni," tiin pressure a neih loh thu a sawi lang.

Ajax captain Davy Klaas­­sen chuan, "Dolberg an lakluhtirh khan tun anga player pawimawh a nih hma hi an beisei lo ang. Amaherawhchu kum la naupang chung siin hlauhthawnna a nei lo a, goal hmaa a awm chuan goal a khung dawn tih a chiang bawk," tiin an Dolberg a fak. Dutch club captain Klaassen hi kum 24-a upa chauh a ni nachungin team zinga chuan kum upa zinga mi a ni.

Coach Peter Bosz chuan, "Europe club dang leh Dutch club sum lama inthlauhna hi a nasa a, hetiang dinhmun kan thlen theih hi min beisei sak lo. Tunah chuan Ajax ṭantu chauh ni loin Holland tana chhuan thamin result ṭha kan nei a, Dutch football tan a ṭha a ni," tiin an thlen chin chu chhuanawm a tih thu a sawi.

Bosz hi Feyenoord pla­yer hlui a ni a, tun hma aṭang­in Ajax-in kalphung nghet a neih thu sawiin, "Tun hma aṭangin kan inkhelh apiangin min hneh a ni ber. Tuna kan khelh dan pawh Ajax khelh dan tho kha a ni a, an fin bakah hlauh an nei lo," tiin attacking football an khelh ngam thu a sawi.

An khingpui tur Jose Mourinho hote erawh a ṭul phawt chuan defensive game khel ngam an ni thung. English club hi chak tura rinkai zawk ni mah se hrem vangin Eric Bailly a khel thei dawn lo a, pressure an ngah zawk dawn bawk avangin talbuai thei an ni.