Pound maktaduai 50?

Manchester United-in Europa League final-a Ajax an hneh lo a nih chuan pound maktaduai 50 chan thei dinhmunah an ding.

Europa League champion hian pound maktaduai 6.5 an dawng dawn a, chak lo zawk hnenah pound maktaduai 3.5 pek an ni dawn. Amaherawhchu lawmman chiah hi club lian ho sum hmuhna a ni lo a, hei vang hian zanina final khelh tur hi a pawimawh a ni.

United hian Germany company lar Adidas nen kum 10 atan pound maktaduai 750 in an rem a, Red Devils hian kum zawna Europe-a inelna sang ber an khelh phak loh chuan pound maktaduai 21 an chawi dawn. Hei chauh hi a ni lo, United hian Champions League an khelh phak chuan pound maktaduai 30 an hlawh thung dawn.

Red Devils financial officer Cliff Baty chuan, "Adidas leh Champions League hi keini tana lawmman sang zawk chu a ni," tiin a sawi. Baty hian United-in Champions League an khelh chuan pound maktaduai 40 aṭanga 50 an hmu chhuah theih a beisei thu a sawi tel a, Europa League aṭanga pound maktaduai 15-20 bawr vel chauh hmuh an beisei bawk avangin English club tan season thara UCL khelh hi a pawimawh a ni.

Ram khat aṭangin club panga aia tamin Champions League an khel thei lo a, hei vang hian Manchester United hian Europa League aṭangin UCL khelh theihna ticket an la a nih pawhin English club dang tan hlauhthawnna tur a awm lo. United hian Premier League champion Chelsea, Tottenham Hotspur, Manchester City leh Liverpool te hnung an zui dawn chauh tihna a ni.