Premier League - Tute nge Europe-ah inlan dawn?

Premier League aṭangin champion thar Liverpool leh Manchester City ten Champions League an khel dawn tih a chiang tawh a, hmunruak pahnih a la awm. Europa League hmunruak pathum a la awm - Premier League pangana, League Cup leh FA champion tan a ni.

Man City-in League Cup nomawi an chawi tawh avangin league-a paruknain Europa League an khel ang a, FA Cup-ah Champions League khel tura tling tawh an champion a nih chuan league-a pasarihnain hmunruak hi an luah khat ang.

Champions League khel turin palina a tawk lo thei tlat. Champions League leh Europa League-ah Premier League-a palina ni phak lo an champion a nih chuan league-a palina meuh pawhin Europe-a inelna sang ber an khel thei lo ang.

A chhan chu ram khat aṭangin a tam berah club panga chauhin UCL an khel thei a, Champions League leh Europa League champion tan quota pakhat ve ve a awm avangin English club pahnih Europe-a inelna sang pahniha an champion a nih chuan league-a a ti ṭha pathum chauhin an khel thei dawn.

Amaherawhchu tun dinhmunah English club aṭangin Manchester City leh Chelsea chiah UCL-ah an dam tawh a, City-in pahnihna dinhmun an nemngheh tawh avang leh London club-in first leg-ah Bayern Munich 3-0 ngawta an hneh loh avangin Premier League-a palinain Champions League an khelh ngei a rinawm thung.

Chelsea-in Liverpool (a, July 22 zan) leh Wolverhampton (h, July 26) an la hmachhawn dawn a, pathumna la hauh mah se a chhe berah point li hmuh a la ngaih avangin an dinhmun a la him lo. Chutihrualin elpuite fixtures a hautak ve tho a, Liverpool an hmachhawn meuh chuan point thum chauh an mamawh thei bawk.

Leicester City-in zanin hian Sheffield United an mikhual dawn a, Tottenham Hotspur (a, July 19) leh Manchester United (h, July 26) an la hmachhawn dawn. Brendan Rodgers-a hote hi palinaah la awm mah se an khingpui turte hi an la khirh miau avangin UCL hmunruak inchuh club pathum zinga dinhmun chhe berah an ngai.

Manchester United-in zaninah Crystal Palace an tlawh dawn a, West Ham (h, July 22) leh Leicester City (a, July 26) te nen an la inkhel dawn bawk. United-in UCL beisei sang viau mah se Southampton laka an chetsual avangin chesual thei an ni a, chutihrualin Foxes nen hian an point hmuh zat, goal difference leh goal khung zat a la inan vek theih avangin palina inchuh tura Playoff khelh theih dan a la awm. A thleng a nih ngat chuan ngaihven a hlawh khawp ang.

Wolves-in nizan khan Burnley an tlawh a, Crystal Palace (h, 20 July) leh Chelsea (a, 26 July) te an la hmachhawn dawn a, vanneih chuan Champions League la khel thei an ni a. Amaherawhchu UCL khel tur chuan league aiin Europa League-a champion-in a awlsam tawh zawk ang.

Sheffield United-in zaninah Leicester an tlawh dawn a, Everton (h, 20 July) leh Southampton (a, 26 July) te an la hmachhawn dawn. Parukna china awm turin Wolves chetsual a ngai a, match thum hmabaka an chak vek chuan pasarihna chinah chuan an awm chiang.

Tottenham Hotspur-in nizan khan Newcastle an hmachhawn a, Leicester (h, 19 July) leh Crystal Palace (a, 26 July) te nen an inkhel dawn. Jose Mourinho hote tan Europa League khelh pawh a harsa tawh a, vanneihna an mamawh ang.

Arsenal-in nizan khan Liverpool an hmachhawn a, an hmabak chu Aston Villa (a, 21 July) leh Watford (h, 26 July) te an ni. Gunners tan Europa League khel turin FA Cup-a insawrbing a pawimawh tawh zawkin a lang a, semifinal-ah Manchester City an hmachhawn dawn.

Nizana Wolves hmachhawntu  Burnley tan Europa League khelh theihna kawng a la inhawng a, amaherawhchu Clarets hian Norwich (a, 18 July) leh Brighton (h, 26 July) te an hneh chhunzawm a nih pawhin club dang result-ah an innghah a ṭul ang.