Man United player an zin vek dawn

Manchester United manager Jose Mourinho chuan player inhliam zawng zawng nen Europa League final an khelhna tur an pan vek tur thu a sawi.

Portuguese manager chuan, "An vaiin an zin ang. Inhliam tlem a zawng chu kan nei a, anni pawh an zin vek tur a ni. Season ṭantirh aṭangin inlungrual takin kan thawk­ho a, team boruak pawh a ṭha a ni. Kan ina kan awm aiin kan zinna kan hun hman, kan inkhelh hun hman leh hotel-a kan hun hman hi a tam zawk a, kan hun hman ho hi a tam hle. Inhliam Young, Shaw, Rojo leh Zlatan te an zin vek ang," tiin Stock­holm an pan vek tur thu a sawi.

Final khelhna tur hmun Friends Arena hi Zlatan Ibrahimovic-a'n England lama goal ropui a khungna hmun kha a ni a, 2013 FIFA Puskas Award (Goal of the year) a dawn phah bawk. He stadium hi Sweden-in an home match an khelhna hmun a ni a, stadium sak ṭhat hnua goal hmasa ber khungtu chu Zaltan-a a ni.

Tun season-a United tana goal khung tam ber Zlatan hi inhliam vangin Europa League final-ah inlan lo pawh ni se a ropuina a nep lo. Sweden national stadium kawtah hian Zlatan-a milim 2.7 metre-a sang chu dah turin nikum December thla khan thutlukna siam a ni tawh.