East Bengal-ah Chullova a lut

Aizawl FC defender Lalram­chullova chuan East Bengal a zawm. Armed Veng tlangval hian Kolkata club tana khel tur hian kum hnih chhung atan contract a ziak a, Aizawl FC-in I League nomawi an chawina kawnga thawhhlawk tak Mahmoud al Amna chuan Kolkata club hi a zawm ve bawk.

Chullova chuan, "East Bengal hi club ṭha tak an ni a, mahse chona thar hmachhawn duh vanga he hmun hi pan ka ni. Hmun pawi­mawh chang phak turin theihtawp ka chhuah ang a, Pathian zarah hun duhawm tak ka hman theih ka beisei a ni," tiin Vanglaini a hrilh a, rim taka thawh a tum thu a sawi.

Mizoram Premier Lea­gue 3 best player hian amah siam liantu Aizawl FC a theihnghilh lo. Chul­lova chuan, "Aizawl FC aṭang­in bul ka ṭan a, he club-a khelh reng hi duh mah ila chona thar hmachhawn tura ka chhuah a ṭul si a ni. AFC hi mipui hmaa min phochhuak a, ka theihnate pholang tura hun ṭha min petu an ni a, ka tan chuan an hlu takzet. Ka chunga an ṭhatna avang khan lawmthu ka sawi a, East Bengal ka zawm hi anni pawhin min lawmpui ka ring a ni," a ti.

Mizo tlangval chuan a zinkawng a inṭan chauh nia a hriat thu sawiin, "Hmabak tam tak ka la nei a, Pathian zarah tun hi ka hun tawp a nih loh ka beisei. Theihtawp chhuahin ka bei zel ang a, ram tana inlan phak tur khawpa ka theihna phochhuah ka tum dawn a ni," tiin Vanglaini a hrilh a, a hmabak eng takin a thlir.