'Bike leh Chhungkua' titu Nicky Hayden a thi

A duhthusam a thlen dik niah lawm avangin dan rual lohin a biangah mittui a luang a, khawvel a chhuahsan niin amah ui tuten mittui nen an thlah thung. Moto GP legend Nicky Hayden chu accident-naa a hliam tuar loin Thawhṭanni zan khan a thi, kum 35-a upa a ni.

May 17, Nilaini khan Hayden hian Rimini, Italy-ah cycle a khalh a, vanduai thlak takin car-in Hayden hi a su fuh hlauh. Rang takin Cesena's Maurizio Bufalini Hospital-ah hruai niin Intensive Care Unit (ICU)-ah dah a ni, vanduaina a tawh aṭanga ninga hnuah a lu leh awma hliam na tak a tawrh chu tuar chhuak zo loin a thi.

Hayden chhungkaw aiawh Tommy Hayden chuan a uanupa thih thuah thuchhuah siamin, "Hayden chhungkaw tan lungngaihna ni a ni. Nicky khan khawvela a nih chak ber World Champion dinhmun a luah thei a, lirthei khalh chhunga a hmel hlim lai kha inthinlungah a cham ve reng kan duhin kan beisei," a ti.

Tommy chuan sawi chhun­zawmin, "Nicky hian mi tam tak hnenah a nunin thu a sawi tih kan hria, min tawrhpuina leh thlamuana thu tam tak kan dawn avangin lawmthu kan sawi. Mipuiin min hriatpui piah lamah hian chhawngkaw thilah kawng hrang hrangin sulhnu hriatreng tur a ngah hle, nakinah chuan kan la ngai zual kawp ang..." tiin a sawi.

Kentucky Kid

Bike ngaina chhungkua aṭanga seilian a ni a, lemchan thiam Johnny Depp te khua Kentucky a piang a ni. An chenna-ah intliansiak theihna 'Earl's Lane' an neih nghal avangin kum thum mi lek an nih lai aṭangin a unaute nen nitin darkar li chhung vel chu intlan­siak nan hun an hmang ṭhin!

Nicky Hayden chuan, "Ka naupantet lai aṭangin ka nunah thil tum ka nei a, chu chu World Champion nih a ni. Bike ka hriat hma lama ka nun sawi let tur ka hre lo, ka ngaihtuah letin nikhua ka hriat ve hmasak bekah chuan bike bulah ka awm," tiin a sawi.

Naupan laia kan ngaihsan ber pakhat chu mahni pa te an ni ṭhin. Nicky te unau pawhin an pa Earl hnungzuiin Tommy leh Roger te chuan intlansiak khawvel an luhchilh zui a, an hmeichhe unau Jenny leh Kathleen te bakah a nu Rose te ngei pawh intlansiakna hmunah an inel ve ṭhin a ni.

Bike atchilhtu Hayden chuan, "Ka pa hian kum 20 chuang intlansiak khawvel a luhchilh a, nupui atan pawh tlan chak tak a nei; a chhan chu fa bike khalh chak thei tak neih a duh vang a ni," tiin a lo sawi tawh ṭhin. Hayden hian amah hringtu Rose chu a tan fan ṭha leh rinawm ber a nih thu a sawi tel bawk.

World Champion

Kum 2000 hnu lamah khawvela bike intlansiakna ngaihhlut leh sang ber MotoGP-ah rider paruk chiah champion thei an la awm, an zinga pakhat chu Hayden hi a ni.

American rider hian kum 2003 aṭang khan MotoGP a luhchilh, kum hnih hnu lekah pathumna dinhmun a luah thei. Kum 2006 a her chhuah meuh chuan Honda bike khalh chungin a naupan lai aṭanga a duhthusam World Champion a ni thei der mai.

MotoGP champion a nih dawn ṭum hian Hayden hi rinkai a ni phak lo. Khatih laia a zawna season nga chhung champion tawh Valentino Rossi chu rinkai leh nomawi humhim ngei tura ngaih a ni chiang hle.

Season khar nan Valencia Grand Prix tlan a ni a, intlansiak an ṭha hma hi chuan Rossi hian championship-ah Hayden aiin point riatin a hmu hnem zawk - hmahruaitu a ni bawk.

Spain-a intlansiakah Italian rider Rossi hi lap ngnana lekah chesualin a tawpah 13-na dinhmun a luah phak hram a, Hayden chu pathumnaah thlengin championship-ah point ngain Rossi hi a hneh.

American tlangval Hayden-a'n khawvela bike kalh thiam leh hlawhtling bera ngaih Rossi a hneh dan hi BBC commentator Steve Parrish chuan, "MotoGP season ka hmuh tawhah chuan a makin a ropui a, a hlimawm ber bawk," tiin a sawi hial.

Khawvelin a sûn

Rider tam tak an awm tawh a, an awm zel bawk ang. Infiamna khawvelah mi danglam leh uiawm bik an awm, chung zinga pakhat chu Nicky Hayden hi a ni. A thih thu an hriat rualin rider tam takin an ui thu an tarlang nghal, social media lamah khawvel hmun hrang hrang aṭangin amah sunna thu chhiar sen loh a awm.

Yamaha rider Rossi chuan, "Intlansiak khawvelah chuan ka ṭhian ṭha ber pakhat a ni," tiin a chetsual tirh khan a lo sawi tawh. A elpui leh a hneh tak pawhin hetiang ṭawngkam a hman hian Hayden hi ṭhian kawm thiam leh ngainat awm a ni tih a tarlang.

MotoGP rider hlui James Toseland chuan, "Infiamna khawvelah ani aia mi ṭha an awm lo. Intlansiak kan neih dawnin a thleng hmasa ber a, track a chhuahsan hnuhnung leh ber ṭhin bawk. Mi inpe, tumruh leh mi dangte ti phur thei tak a ni. World champion a nih hnuah pawh a mizia a danglam phah ka hre lo - ka thinlung zawng zawngin ka zah a ni," a ti.

Twitter-a word pathum "Bike leh Chhungkua" tih hmanga a nihna pholangtu hi khawvelin a theihnghilh tawh dawn lo, kum 35 chhunga a sulhnu leh hlimthlate hi nakinah chuan mi tam tak mittui kai chhuak thartu a la ni zel dawn - Bike intlansiak khawvelah chuan 'Legend' tia hriatreng a ni tawh ang.