NBA Finals khel tur Warriors

24th May, 2017

Golden State Warriors chuan a zawna season thum nan NBA Finals an khel dawn. Warriors hian nimin zing khan Western Conference Final Game 4-ah San Antonio Spurs chu 129-115 in an hneh a, best of seven series chu 4-0 in an la.

AT&T Center-a inkhelah Western Conference champion tan hian Stephen Curry leh Kevin Durant te chu player langsar niin point 36 leh 29 an score a, Draymond Green-a'n point 16 a neih bakah rebound vawi riat lain assist vawi riat bawk a nei - Klay Thompson leh Ian Clark ten double double nei bawkin Spurs lakah Warriors hian zahngaihna an lantir lo.

Golden State hian tun season playoff match 12 an khelh tawhah hnehna an la chang fai vek, NBA record thar a ni. Eastern Conference aṭanga NBA Finals hmunruak pakhat inchuh Cleveland Cavaliers leh Boston Celtics te inkhela chak zawk nen an inhmachhawn ang. Cavs hian series-ah 2-1 in hma an hruai mek a, an tlang a nih chuan nikum final-a intum ngai team pahnih bawk an intawng nawn leh dawn tihna a ni.

American star Durant chuan, "Kan thawhhona a ṭha tual tual a, team ṭha pahnih inkhel tur zinga pakhat zawk kan ni thei hi a lawmawm hle," a ti. Durant chuan a khelhpui Curry chu player ṭha bik leh khelhpui nuam tak a nih thu a sawi tel bawk.

Spurs coach Gregg Popovich chuan, "Golden State hian basketball hnuhma ropui an hnutchhiah mek a, an siam belh zel bawk ang. Inkhel hmuhnawm bakah hlimawm an lantir ṭhin a, an khingpuite tan hmunawl an siamsak ngai lo," tiin an hneh loh team a dah sang thiam hle.

Kumin NBA Finals hi June 1-ah Game 1 khelh a ni dawn, Golden State hian inkhel pawimawh leh hautak an hmachhawn hmain ni sarih hahchawlhna hun an nei dawn tihna a ni ang. Kum 2015 champion team hi nikum khan Cavs lakah chak ngei tura an lan hnuah an nomawi an hloh a, kuminah chetsual nawn an duh lo tawp ang.

Inkhel Thlirna Tawi
Game 1 San Antonio Spurs 111 - 113 Golden State Warriors
Game 2 San Antonio Spurs 100 - 136 Golden State Warriors
Game 3 Golden State Warriors 120 - 108 San Antonio Spurs
Game 4 Golden State Warriors 129 - 115 San Antonio Spurs