'Pass master' Alonso kan thlah ta

May 21 zan a ni a, Bayern Munich-in tun season Bundesliga-a an match hnuhnung ber an khel a, Spanish legend Xabi Alonso-a match hnuhnung ber a ni bawk - a hun hnuhnungah pawh Arjen Robben goal khung tur chu player naran tana tih theih loh goal a la siam hram. Alonso, he hming hi football leh pass tih nen hian ava inrem em!

Minute 82-na a ni a, Alonso thlak turin Frank Ribery a tlanlut. Allianz Arena-a mipui 7,5000 chuang pungkhawm te an ding suau a, an player ngainat Alonso thlah nan an zai a, kut an beng - Spa­nish midfielder a tlan chhuak a, footballer nichungin khawvelin a hmel kan hmu leh tawh ngai dawn lo.

"Ka naupan lai aṭanga ka ṭan em em Real Sociedad-ah career ka ṭan a, England, Spain leh Germany-a an club ṭha ber ṭheuh­ah ka khel bawk. Nun duhawm tak chu a ni," titu chu a liam ta.

Liverpool legend

Kum 35-a upa midfielder hi khawvelin a hriat ṭanna tak chu Liverpool a ni. August 20, 2004 khan Reds hian pound maktaduai 10.7 sengin Real Sociedad aṭangin an lei a, hetihlai hian Real Madrid-in rim ve bawk mah se English club-in an chang - Rafel Benitez-a'n Reds boss a nih hnua player a lakluh hmasa ber a ni.

Alonso-a'n Liverpool-a a sea­son hmasa berah nomawi a chawi nghal a, Champions League final-a AC Milan laka comeback ropui an lantirna inkhelah player pawimawh niin Europe champion zingah a tel nghal. Alonso-a'n Reds-ah beisei angin hlawhtlinna erawh a chhar chhunzawm lo a, FA Cup (1) leh UEFA Super Cup (1) chu Merseyside club tana nomawi chhuan tur a neih dang an ni.

Hello Real!

Alonso-a'n Liverpool-ah season nga hun a hman chhungin player pawimawh pawl a ni char char a, fan-te ngainat rawn a ni. Mahse, kum 2009 nipui transfer-ah Benitez-a'n a hnu thlenga a inchhirna tur thutlukna a siam a, Gareth Barry lakluh a tumna lamah chhuah duh lo Alonso chu Real Madrid-ah pound maktaduai 30-in a kaltir.

Players ṭha rual awmkhawmna Real-ah pawh Alonso a talbuai chuang lo. "Mi tam tak tana he club hlutna hi ka hria a, Liverpool chhuahsan hi ka rilruah a awm ngai lo," titu midfielder hian Real-ah season ruk hun a hmang a, La Liga (1), Copa del Rey (2), Spanish Super Cup (1) leh Cham­pions League (1) a chawi.

Mangṭha Bayern

Alonso-a'n Spain-ah hlawhtlin theihna ang zawng zawng a chhar hnuin Bayern Munich a pan a, Allianz Arena-ah kum thum chhung hun a hmang. German club-ah pawh hlawhtlinnain Alonso a zui a, Bun­desliga (3), German Cup (1) leh Ger­man Super Cup (1) nomawi a chawi.

Spain tana Alonso hlawhtlinna pawh hi sawi hmaih theih a ni lo. Ram tan match 114 khelin goal 16 a khung a, FIFA World Cup 2010-ah champion-in Euro 2008 leh 2012-ah nomawi a chawipui bawk a, Barcelona players rualin Spain team an 'luah' lai pawhin Alonso hming hmuh hmaih a ni ngai lo.

Pass master

Player technique dik, vision nei ṭha leh ball pass thiam bik sawi a nih apiangin Alonso hming hi tlar hmasa pawlah dah a ni ṭhin. Liverpool tana a season hnuhnung berah pawh khan pass dik vawi 1000 zet neiin Premier League-a season khata vawi 1000 ball pass dik nei thei hmasa ber a ni. September 27, 2014-a FC Cologne leh Bayern inkhelh ṭumin Alonso hian vawi 196 pass dik a nei a, Bundesliga match khata pass dik nei hnem ber record a siam.

Kum 2003 khan Spanish Player of the Year-ah thlan a ni a, FIFA FIFPro World XI-ah 2011 leh 2012 khan a lang phak bawk. Real tana league nomawi a chawi kum 2012-ah La Liga Best Midfielder chawimawina a dawng a, UEFA Euro Team of the Tournament 2012 leh UEFA Champions League Team of the Season 2013-14 ah a lang phak bawk.

Gerrard-a ṭhianpa

Liverpool captain hlui Steven Gerrard chu footballer zinga Alonso thlahna thu sawi chhuak hmasatu a ni. Stevie G chuan, "Career duhawm tak hmanga i chawlh avang hian ka lawmpui che a ni. Midfielder ka khelhpui tawh azawnga khelhpui nuam ber i ni a, ball pass thiam ber i ni bawk. Chawimawina i dawn zawng zawng hi i phu a, club leh ram tana i sulhnu hi chhuan tham a ni," a ti a, Gerrard-a'n Alonso midfielder ṭha ber tia a fak hian England captain hlui hian Javier Mascherano, Frank Lampard, Paul Scholes-te ho a khelhpui tawh tih theihnghilh loh a ṭha.

Players leh coach ropui tak takin Alonso an thlahna thu ziak dawn ila ziah sen a ni lo. "Lunglenna, hrehawmna, hlimna, lungngaihna leh lawmna te a inbelhkhawm vek a, ka awmdan hi sawithiam a harsa a, hetiang level aṭanga football ka mangṭha thei hi ka lawm a ni," tia Alonso-a'n football a thlahna ṭawngkam ngeia a hnu khar hi a mawi zawk e.