I League-ah NEROCA kan hmu dawn

Manipur club ṭha NEROCA FC chuan season tharah I League an khel dawn. Imphal khaw club hian match khat khelh tur la nei mah se Srinagar khawpuiah Lonestar Kashmir chu 4-1 in an sawp a, an hnuai chiaha awm Southern Samity aia point sarih ngawta an san fal avangin umphak theih an ni tawh lo.

Orange Brigade (NEROCA sawina) tan Felix Odili Chidi chuan hattrick a siam bakah Subhash Singh chuan goal khat a khung bawk a, Kashmir club tan Waris Amin chuan goal khat khung ve bawk mah se awmzia a nei thui lo - Manipur club zinga I League khel hmasa ber ni turin NEROCA an inpetkai.

NEROCA zinkawng

2nd Division I League hi group A, B leh C-ah ṭhen an ni a, group khatah team pali zel awmin group tina a ti ṭha pahnih hi final round khel turin an tling. Group B-a match ruk an khelhah vawi khat chiah chak lo hmel hmuin final round-ah Manipur club an inpetkai.

Final round-ah NEROCA bakah S. Malsawmtluanga khelh­­na Southern Samity, Delhi United, Lalrozama Fanai khelhna Fateh Hyderabad, Lonestar Kashmir FC leh Ken­kre FC an inpet tling. Manipur club-in match kua an khelh tawhah vawi sarih hnehna changin vawi hnih an khingpui an inhnehtawkpui a, an match hnuhnung berah chak lo pawh ni se point sariha an san fal tawh avangin umphak theih an ni tawh lo.

Tute nge NEROCA?

Kum 1965-a din NEROCA hi an club hming lampum chu North Eastern Re-Organising Cultural Association Football Club tih a ni a, Pune FC academy boss hlui Gift Raikhan chu an coach a ni.

NEROCA hian player lang­sar tak tak an kawl nual. Pune City aṭangin goalkeeper tawnhriat nei ṭha Lalit Thapa leh Japanese midfielder, India khua leh tui nihna nei Arata Izumi an lalut a, Delhi Dynamos leh Pune City defender hlui Govin Singh, India tana vawi 27 inlan thei, Atletico de Kolkata striker hlui Sushil Kumar Singh-te ho an kawl a, Champhai tlangval David Lalbiakzara an nei bawk.

NEROCA coach

I League-a Aizawl FC hruai thlengtu chu Mizo coach K. Malsawmkima a ni a, I League-a Manipur hruai thlengtu coach pawh tualchhung tlangval Gift Raikhan a ni. Manipuri coach hian player a nih laiin Churchill Brothers, HAL, Indian Bank, Vasco leh Pune FC tan a khel.

Inkhelh a chawlhsan hnuah coaching lamah a kal a, kum 2008-10 chhung khan Pune FC U17 leh U15-ah assistant coach a ni. Kum 2011 khan Pune F.C U20 coach-ah kaisantir a ni a, 2012 I-League U20-ah a team hi a champion pui. A hnathawh ṭhat avang hian kum 2013 khan Pune senior team-ah assistant coach atan ruat a ni a, hetihlaia Pune FC boss chu Dutch manager Mike Snoei a ni. Vawiinah erawh player a nih laia left back ṭhin hian an state club ngei chu I League a hruai thleng ta.