Number 1 Murray a mangang

Thawhṭanni tlai khan mipa tennis thuneitu sang Association of Tennis Professionals (ATP) chuan world ranking thar a ti chhuak. Andy Murray chuan hmun sang ber luah mah se tun hnaiah result ṭha a neih theih loh avangin a buai thu a sawi.

May 28 aṭangin French Open khelh a ni tawh dawn a, tun hnaia nomawi chawi hleithei lo Murray tan a la hlawhtlin ngai lohna hmuna nomawi chawi tur chuan harhtharna chan a mamawh.

Britain tlangval Murray chuan, "Chhuanlam zawn buai a ngai lo, ka chak loh chhan chu ka khelh chhiat vang a ni. Inbuatsaihna hun tlemte ka neih hi chhawr ṭangkai ngei ka duhin clay-ah nomawi chawi ngei ka duh a ni," tiin a sawi.

Kumin clay court tournament an khelh tawh langsar - Monte Carlo, Madrid, Barcelona leh Rome Open-ah te Murray hian final a lut miah lo a, a nomawi kawl lai pawh a chân a ni.

ATP ranking tharah hian a sang pathum Murray, Novak Djokovic leh Stan Wawrinka te chu an dinhmun ngaiah an ding. Grand Slam vawi 14 champion tawh Rafael Nadal-a'n hma sawn zelin palina dinhmun a luah.

French Open khel lo tur Roger Federer chu panganaah a tla hniam, Swiss star hian ranking hi a ngaih pawimawh ber a ni tawh lo. Italian Open champion thar Alexander Zverev chu a sang 10 zingah a lang thar thung a ni.