Kushal Das dawr tur Kolkata club

Federation Cup final khelh zawh a nih hnu lawkah East Bengal leh Mohun Bagan hotute chuan Indian Super League chungchanga All India Football Federation (AIFF) general secretary Kushal Das titi pui turin New Delhi an pan.

East Bengal hotu zinga mi, a hming tarlan loh chuan, "India rama club inelna sang bera khelh ngei kan duh. Club pahnih hotute hian West Bengal sports minister Aroop Biswas pawh inbiakna kan neihpui ve ve tawh a, ani pawhin a tawp thlenga min thlawp tur thu min hrilh a ni," a ti.

Kolkata club lian pahnih hian ISL an khel a nih chuan season hnih chhung atana Kolkata khawpui pawn an khelmual atana hman pawh an pawiti lo a, hei hi a chhan ber chu Atletico de Kolkata leh ISL ten kum nga chhunga ATK home atana Kolkata hman a nih chungchangah inremna an lo neih tawh vang a ni.

East Bengal leh Mohun Bagan hian franchisee fee vaibelchhe 15 vel nia ngaih chu pek loh an duh a, hei mai piah lamah hian ISL aṭanga sum lut hmuh tel ve an inbeisei bawk. Heng zawng zawng hi AIFF lamin an pawm kher erawh thil beiseiawm a ni lo.