United fiahna tur Palace

Manchester United phur vanglai takin Southampton-in an chelh a, Ole Gunnar Solskjaer hote hian zanin dar 12:45-ah Crystal Palace an hmachhawn dawn. Selhurst Park-a inkhel tur hi United dinhmun fiahna a ni dawn a, an hmalam hun hriltu a ni thei bawk ang.

Saints laka point khat chauh an hmuh avangin United hnual mah se khelmual pawn lamah lawmna tur a awm. Marcus Rashford chuan naupang rethei zawkte tan England sorkar hnenah chhun chaw ei tur a sawi chhuah avangin University of Manchester-in doctorate degree an pe dawn. English forward hi chawimawina dawng thei naupang ber niin Sir Alex Ferguson leh Sir Bobby Charlton te pawhin an lo dawng tawh bawk.

Palace nena an inkhel turah erawh hliam vangin Luke Shaw leh Brandon Williams te dinhmun a chiang lo a, left back pahnih hi Solskjaer-a'n a chhawr thei lo a nih chuan player inrem a harsa sawt ang. Solskjaer chuan, "Soton laka point hloh a uiawm. Brandon inhliam vangin 10 in kan khel a, an palen bawk avangin dan an harsa. Kha aia ṭha chuan goal venghim tur kan ni a, chutihrualin team anga kan khelh danah ka lawm," tiin a naute a chhan a, Palace lakah erawh Paul Pogba leh Bruno Fernandes ten chhan ngai loa awm an tum ang.

Old Trafford-a an inkhelh ṭumin Palace an chak a, Selhurst Park-ah erawh Eagles an kim dawn lo. Christian Benteke chu hrem vangin Eagles tan a inlan thei dawn lo a; Gary Cahill, James Tomkins leh Jeffrey Schlupp te hliam vangin an inlan dawn lo. Chutihrualin Palace-in an intawn hmasak ṭuma goal khungtu Jordan Ayew an kawl a, United-a beisei pha ta lo Wilfried Zaha pawh hi Eagles kawr nen chuan club lian tam tak defender-te ngam loh a ni.