Big Sam-a'n Palace a chhuahsan ; Coaching a chawlhsan dawn em ni?
Sam Allardyce chuan Premier League-a Crystal Palace a inhamtan pui hnu lawkah banna a thehlut a, English club-ah hian thla nga bak hun a hmang hman lo. Kum 62-a upa manager hian Palace a chhuahsan thu a puan rualin, "Hmun dang pan tumna ka nei lo," tiin a sawi nghal a, coach hna a chawlhsan dawn nia ngaitu an tam hle.
Kum 62-a upa manager hian December khan Alan Pardew thlakin Palace hi a enkawl ṭan a, kum hnih leh a chanve cham turin contract a ziak. Palace a zawm lai hian tla thei dinhmun aṭanga an himna chu point khat chiah a ni a, mahse Big Sam hnuaia match 21 an khelhah vawi riat chakin 14-naah season an khar thei a ni.
Mangṭha PalaceṬ
English manager Big Sam chuan, "Thutlukna siam harsa tak a ni a, mahse kawng lehlama ngaihtuah chuan a hahdamthlak em em lawi si. Crystal Palace leh Steve Parish (club chairman) ten lungawi taka he game ka chhuahsan theih nana hun ṭha min siamsak hi ka lawm takzet a ni. England-a ka hmingchhe tawh sa thai rehna remchang min siamsak a, hrehawm taka ka awm lai khan Premier League-a kir leha ka theihna pholan hi ka chak ber a ni ṭhin. Chu hun ṭha chu anni hian min siamsak a ni," a ti.
Bolton Wanderers, Blackburn Rovers, Newcastle United leh West Ham boss hlui hian England chu match khat chauh a enkawl hman tihin a chhuahsan a, hei hi player transfer chungchanga thamna sum laa puh a nih vang a ni.
Premier League aṭanga a team la relegate pui ngai lo coach chuan, "Hun ṭha min petu an nih avangin Palace chhuahsan hi a harsa a, mahse board of directors ṭha tak, players ṭha tak tak leh fans ka hmelhriat tawh azawnga he game hmangaih bertute nen hian he club hian hmalam a pan thei ang tih ka ring," tiin a chhuahsan tak club chu duhsakna a hlan.
Mangṭha football
Premier League-a match kaihhruai hnem lama Sir Alex Ferguson, Arsene Wenger, Harry Redknapp leh David Moyes chiah tluk lo Sam chuan, "Hringnunah hian enge tih kan duh a, khawiah nge awm kan duh? tih chungchanga thutlukna siam a ṭul hun a lo thleng ṭhin. Ka kum la naupan lai leh hrisel lai hian hum hlimawm hman ka duh a, chakna ka la neih lai hian zin khaw thawn a, Premier League manager pressure awm miah loa ka chhungte leh ka tute nena hun tam zawk hmante ka duh, chu chu ka nupui leh ka chhungkaw laka ka bat a ni," a ti a, a chawlh hlen dawn leh dawn loh erawh a sawi lo.
Big Sam chuan sawi chhunzawmin, "Tun hi ka tan chawlhna hun ṭha ber a ni a, ka thinlungah chu chu ka hria a ni. Club dang enkawl chakna pawh ka nei lo a, club enkawl chunga hah taka awm renga ka hlimpui theih loh thil tam takte kha hlim pui a, hun nuam tak hman ka duh a ni," tiin club enkawla rilru sen reng chu a nin tawh thu a sawi.
English manager chuan Palace lama buaina a neih avanga thutlukna siam a nih loh thu a sawi bawk a, Selhurst Park-ah thla nga lek hun hmang mah se nuam a tih thu 'coach' hna chu a ngaih tur thu a sawi nghal.