Champion tur hian kan thawhhona a ṭha - Vikings coach

Mission Veng Vikings coach Reuben Lalchhandama chuan Mizoram Super League Season 3 an champion theih chhan chu club chhung lama thawhhona ṭha tak a awm vang a nih thu Vanglaini a hrilh.

Thlirletna

Vikings-in season bul an ṭan fuh tawk lo a, an vannei loh bawk avangin relegation playoff khel tura ngaih an ni hman. Chanmari tlangval ChD-a kaihhruai club hian Chanmari Hollow leh Zarkawt BCA an hneh lo a, an chak loh vawi hnihna hi state pawn player Rikin Pethani leh foreigner Ronald March tel chunga chak loh a nih avangin champion rinkai zingah dah tel an ni tawh lo.

Amaherawhchu March-a'n match hmasa berah a theihna angin a la khel chhuak reng reng lo tih Khatla TBL an hneh ṭumin a rawn pholang a, American player chet ṭhat hnuah Mizo dang zawngin inrintawkna an nei bawk. Vikings hi final thleng turin match ruk a zawnin an chak a, season liam taa semifinal-a an hneh loh Tuikual South chu league round tiamin a zawnin vawi thum an hneh.

Final-ah Vikings-in Game 1-ah hnehna an chang zo lo a, Khatla TBL-in vawi thum champion inbeisei hman mah se Mission Veng-in MSL3-ah team ṭha ber an ni tih lantirin ChD-a hoten game hnuhnung pahnihah champion lai hi an sawp.

Hmanraw ṭha

Vikings coach Reuben Lal­chhandama chuan, "Season

ṭan­tirh lamah khan ka sawi tawh a, kan hotuten hman theih turin hmanraw ṭha min chhawp sak a, hman thiam leh thiam loh chu kan kutah a awm. Tunah chuan club hotuten sum an sen hreh loh rah kan seng a, nomawi kan chawi ta a ni," tiin club hruaitu chungah a lawm thu a sawi.

Chanmari tlangval ChD-a hman theih tur hian Ronald March bakah Mizo player ṭha Moses Zoremmawia, Michael F. Lal­awm­puia, Lalrina Renthlei leh Lal­ruatkima Sailo te an awm a, Vikings coach hian a player neih ang a hmang thiam tih a takin a lang.

ChD-a chuan, "TBL-in So­lomon leh Akash te an nei a, keini lamin March kan nei thung. March hi point nei turin kan mamawh a, tlarhnungah Solo a ven leh bawk chuan a chau tih Game 1-ah a lang. Final match hmasa ber kan khelh zawh aṭangin Lalrina'n training-naah March a veng a, hei hi ṭha taka Solo a ven hneh theih nan a ni," tiin Vanglaini a hrilh a, an tifuh hle tih chu Game 2 leh Game 3 entu tan chuan hmuh theih a ni a, Vikings coach hian a hmanraw neih ang a hmang ṭha a ni.

Coach a lawm

Mission Veng coach ChD-a chuan, "Kan club vice chairman Lalhmangaihtluangkima hi tun dinhmun kan thlen theihna chhan a ni a, ani hian club tluchhe tur chu club hmangaihna nen a tung ding. Ani hi kan club chairman ṭhin niin sum leh pai a ui miah lo a, a thawh zarah MSL khel thei kan ni," tiin Chaltlang pa a fak.

ChD-a chuan lawmthu sawi chhunzawmin, "Kan club chairman thar Zothantluanga (Zothan Auto) hian champion tumin hma a rawn la a, March hi kan champion chhan a nih chuan American player kan lak theih nana hma latu hi nomawi kan chawi theihna chhan tih a chiang a ni," tiin Vanglaini a hrilh.

Mission Veng champion puitu coach ChD-a hi Chanmariin tualchhung basketball an thunun laia player ṭha zinga mi kha niin basketball bakah cricket khelh a thiam bawk. ChD-a hian thluak a nei ṭha tih a hriat hle - Mizoram chhunga cricket inelna sang berah Chanmarians chu tun season khan a enkawlna hnuaiah a champion pui bawk a ni.