Zaninah volleyball inelna lian

Mizoram chhunga volleyball inelna lian leh ngaihhlut ber GIG Motors Pro Volleyball League chu zanin aṭang­in R. Dengṭhuama Indoor Stadium, Mual­puiah khelh ṭan a ni dawn.

Mizoram Volleyball Association buatsaih inelna a inkhel hmasa ber tur hi MVA Invitation champion Chhinga Veng leh anmahni ang thoa PVL vawi khat khelhna tur Ramhlun Sporting Club an ni, inkhel hi dar 8:00-a ṭan tur niin LPS 1-ah live a ni ang - a hmuna en tur tan ticket man a awm lo.

Chhinga Veng hian India interna­tional player Gurinder Singh leh spiker Mandeep Singh an chahlut a, Gurinder hi kum 2004-2007 chhunga India captain ni thei a nih avangin champion an tum ngam.

RSC lam hi Pro volleyball playoff paltlang zo lo kha an ni, team inlan tur dang an remchan loh avangin an tling leh hnuhnawh. Inelna an hmachhawn dawn takah chuan squad ti chak turin Kerala Police aṭangin VP Hafeel an lalut a, a hma aiin an ṭha sawt ang.

Pro volleyball 2-ah hian mipa team ṭha panga - TNT, Hunthar, 3rd MAP, Chhinga Veng leh Ramhlun Sporting Club (RSC) bakah season hmasa lama an telh loh hmeichhe inelna chu telh thar a ni. Hmeichhe team pathum - Power Department Sporting Club, Electric Veng leh Durtlang ten May 30, Thawhlehni aṭangin inelna bul an ṭan ve thung ang.

Mipa team panga hi league round-ah an inkhel kual vek ang a, a sang paliin semifinal an lut ang. Hmeichhia erawh team pathum chiah an nih avangin an inkhelh kual hnuah a sang pahnihin final an khel dawn a ni.

Kumin PVL-ah hian international referee Thokchom Romeo Singh chah luh a ni. Manipuri referee Romeo hi Asian Junior Women Championship 2014 leh South Asian Games 2016-ah te khan referee ni tawhin tun ṭumah hian inelna match zawng zawngah referee a ni vek dawn a ni.

Zanin Inkhel Tur
Chhinga Veng vs Ramhlun SC (Mipa)
May 26, Zirtawpni
3rd MAP vs TNT (Mipa)
May 27, Inrinni
Hunthar vs Chhinga Veng (Mipa)
May 30, Thawhlehni
Power vs Electric Veng (Hmeichhia)
May 31, Nilaini
TNT vs Hunthar (Mipa)
Jun 1, Ningani
Chhinga Veng vs 3rd MAP (Mipa)
Jun 2, Zirtawpni
Ramhlun SC vs TNT (Mipa)
Jun 3, Inrinni
Hunthar vs 3rd MAP (Mipa)
Jun 6, Thawhlehni
Durtlang vs Power (Hmeichhia)
Jun 7, Nilaini
Ramhlun SC vs Hunthar (Mipa)
Jun 8, Ningani
TNT vs Chhinga Veng (Mipa)
Jun 9, Zirtawpni
3rd MAP vs Ramhlun SC (Mipa)
Jun 10, Inrinni
Electric Veng vs Durtlang (Hmeichhia)
Semifinal - Mipa
Jun 13, Thawhlehni
Pos 1 vs Pos 4
Jun 14, Nilaini
Pos 2 vs Pos 3
Final
Hmeichhia
Jun 16, Zirtawpni
Mipa
Jun 20, Thawhlehni