Indonesia hnehtu India-in beisei nei
Ram leh ram badminton hmanga inelna pakhat Sudirman Cup khelh mekah India chuan knock out round lut turin beiseina an la nei zel. Thawhlehni khan Indonesia chu 4-1 in an hneh.
India hian an match hmasa zawkah Denmark 4-1 in an ngam lo a, a zawnin chak lo ni se beisei an nei tawh lo ang. Group match hnuhnung berah Indonesia-in Denmark an hneh ve leh thung chuan kawng a la inhawng dawn a ni.
Sudirman Cup hi mixed team badminton championship a ni a, kuminah hian India aiawhin Kidambi Srikanth, PV Sindhu, Ashwini Ponnappa, Satwiksairaj Rankireddy leh N Sikki Reddy te an inlan.
Tun ṭumah hian seeded ram 32 inlan tur an ni a, Mexico, Netherlands, Spain leh Sweden te an inhnuhdawh leh tak avangin ram 28-in inelna an hmachhawn. Group paliah ṭhen hran an ni a, India hi group 1-ah awmin an awmna group hi (1A, 1B, 1C leh 1D)-ah te ṭhen hran an la ni leh a ni.
Inelna hi Gold Coast, Australia-ah neih niin a vawi 15-na a ni. Kum 1989 aṭanga neih ṭan niin tun ṭum hi Asia emaw Europe emaw ni lo hmun danga nghah a nih vawt khatna a ni.
India hian kum 2011 khan knock out round a lut ve tawh a, tun hnai inelna hnuhnung pahnihah erawh group stage an paltlang zo lo. Kuminah pawh ram dang inkhel result-ah an innghah leh rih a ngai tawh a ni.