Naktukah ISL khel tur a chiang dawn
Indian Super League khel tur chu naktukah tih chian a ni dawn. Indian Super League enkawltu Football Sports Development Limited (FSDL) chuan tun thla tir khan ISL-ah hmun ruak a awm thu puangin a duh tana dil theihin dilna hun an hawng a, vawiin hi dilna thehluh hun tawp ni a ni.
FSDL hian khawpui 10 thlang chhuakin Ahmedabad, Bengaluru, Cuttack, Durgapur, Hyderabad, Jamshedpur, Kolkata, Ranchi, Siliguri leh Thiruvananthapuram aṭanga dil theih turin an ti a, I League champion Aizawl FC innghahna Mizoram khawpui Aizawl a tel ve lo.
Tute nge tel dawn?
I League club zingah Invitation to Bid (ITB) document hi Bengaluru FC leh East Bengal-in an la tawh a, Mohun Bagan chu nimin lam khan la turin an inbuatsaih bawk. Sumdawng lian langsarah Tata Group chuan ISL khelh ve tumin ITB hi an la chhuak tawh bawk a, Techno India Group chuan nimin khan an la chhuak nia tarlan a ni bawk.
Bengaluru FC-in a tir aṭanga an tum ber chu ISL khelh a ni. Season hmasaa hlawhtling taka an club lo kaihruai tawhtu Ashley Westwood contract a zawh pawh khan hlawh tlem zawk hlawh turin contract an zawrh a, hei hi a chhan ber chu ISL club 'coach' ni turin ISL criteria Ashley Westwood-a'n a tlin lo a, Blues hian 'in ban' tawp aiah an club siam liantu hi an dawr ni berin a lang - Barcelona assistant hlui Albert Roca an lalut zui.
Kolkata club engtin?
ISL lamin engkim uluk takin an duang sa a, an fimkhur hle. ISL-a hmun ruak a awmthu an puan rual khan, "Kolkata aṭanga diltu club chu ISL khel tura thlan an nih chuan season hnih chhung (2017-2018 leh 2018-2019) chu Kolkata khawpui pawnah Atletico de Kolkata nena buaina a awm loh nan an home match an khelh a
ṭul ang," tiin an dah thlap.
ISL-a tel dil theihna khawpui zingah Durgapur hi Mohun Bagan-in academy an neihna a ni a, Siliguri hi East Bengal-in an second home-a an hman a ni bawk - ISL lam hian Kolkata club lian pahnih an rilrua dah reng chungin khawpui pahnih hi an dah tel niin a lang a, Bagan leh East Bengal-in ISL an khel a nih pawhin a mak lo ang.
Engtinnge I League?
A tirah I League leh ISL inzawm tura tih a nih tur thu sawi a ni zet a, a hnu lawkah Mizo club-in champion nomawi an chawina inelna hi India rama league sang ber a nih reng tur thu AIFF president Praful Patel-a'n a sawi. Mahse, I League club ṭha pathum Bengaluru, East Bengal leh Bagan ten ISL an pan a nih chuan I League hlutna a tlahniam sawt dawn tihna a ni a, sum tam zawkna ISL player-ten an pan ngei ang a, I League hi ṭawngkain 'league sang ber' a nih thu sawi ni ṭhin mah se a tak ramah erawh a ni dawn lo tihna a ni.
Asian Football Confederation (AFC) lamin la pawm chiah lo mah se ISL champion-in season thar aṭanga AFC Cup playoff an khelh tur chu pawm a nih ngei rin a ni a, heti a nih chuan ISL hi 'tournament' pakhat ve mai ni tawh loin FIFA hriatpui thlap inelna a ni tawh dawn tihna a ni nghal bawk.
Kum thum dang
League pahnih awm tur avangin Indian football a buai nuai niin a lang a, FIFA general secretary Jerome Valcke meuh pawhin ram pakhata league pahnih a awm theih loh thu a lo sawi tawh. Mahse, AIFF president Praful Patel chuan, "Valcke thusawi hi ka pawm thlap a, tuna league pahnih kan neih hi chu 'reilo te' atan chauh a ni. ISL nen hian kum thum chhung atan contract kan la nei a, chumi hnuah kal zel dan tur chu kan la ngaihtuah leh ang," a ti.
Patel chuan sawi chhunzawmin, "Tun aṭanga kum thumah ruahmanna mumal zawk nen ISL leh I League hi kum thum hnuah chuan league pakhatah kan chhun fin ngei ang. I League hi league sang ber a ni reng rih dawn a, kartawpah inkhel awmin Star Sports-in a pe chhuak tawh ang. Keinin kan duh ber chu club-te hian fans tam zawk stadium-ah ko khawm thei se tih hi a ni," a ti a, I League club tan chiaina tur a awm lo niin a sawi.