Clay court inelna lian a hnai

Grand Slam tournament pali zinga clay court-a an khelh awmchhun French Open 2017 chu May 28 aṭangin khelh ṭan a ni leh dawn ta, June 11-ah final khelh tur a ni ang. Clay court inelna lian hi kum 1891 aṭanga khelh ṭan niin, kumin hi vawi 116 an neihna tur chiah a ni.

Kum dang ang bawkin tun ṭumah hian inelna category chi hrang hrang - singles, doubles leh mixed doubles a awm ang. Junior leh wheelchair player-te tan inelna buatsaih a ni dawn bawk. Mipa champion lai chu Novak Djokovic niin hmeichhe nomawi kawltu chu Garbine Muguruza a ni thung.

Grand Slam vawi 12 cham­pion tawh Djokovic chu May thlatir khan a coaching team nen an inṭhen a, coach nei loin Italian Open final a lut. French Open bik atan hian world number 1 hlui Andre Agassi nen an thawkdun ang. Serbian tlangval hi champion lai ni mah se seeded pahnihna a ni dawn a, world number 1 Andy Murray chu seeded pakhatna a ni ang.

French Open hi...

Inelna hi court hrang hrang 22 zetah khelh tur a ni dawn a, heng zingah hian Court Philippe Chatrier, Court Suzanne Lenglen leh Court 1 te chu player langsar leh inkhel pawimawh bik khelh nana vohbik a ni ang. Mipa leh hmeichhe singles-ah player 32 ve ve chu seeded an ni a, heng category pahnihah hian wild card pariat pek chhuah a ni bawk.

International Tennis Fede­ra­tion (ITF) buatsaih, ATP leh WTA World Tour calendar a event lian tak pakhat French Open hi Grand Slam tournament dang Australian Open, Wimble­don leh US Open te nen a khelhna hmun a danglam em avangin beisei loh result kan hmu fo - thahrui hman tam ngaihna ber tiin an sawi ṭhin.

Clay court?

Grass court leh hard court te nena khaikhin chuan clay-ah a ball kal vel a chak loh bakah a sawt sang duh bik. Service na tak tak leh volley na tak tak pawh lei (clay) a thlen hnuah ball a kal zawi ṭhin. Hetianga court dang nen ball kal dan a inan loh em avang hian tennis player ropui tak tak zingah pawh hlawhtling thei miah lo an awm.

Grand Slam nomawi vawi 14 zet chawitu Pete Sampras pawh khan kum 1996-a semifinal a luh bak a sang pali zingah a tel pha lo a, final phei chu vawi khat mah a lut lo hial a ni. Sampras ang tho hian player ropui tak tak - John McEnroe, Frank Sedgman, John Newcombe, Venus Williams, Stefan Edberg, Louise Brough, Martina Hingis leh Virginia Wade te chuan French Open nomawi hi an chawi thei lo.

Hetih lai hian ball vaw na vak lo, mahse ball vaw vir thiam bik tan chuan hmun ṭha leh duhthusam a ni ve hlauh thung. Baseline players - Rafael Nadal, Bjorn Borg, Ivan Lendl leh Mats Wilander, Justine Henin leh Chris Evert te tan chuan clay hi hmun duhthusam a ni.

Player ropui ṭhenkhat Wimbledon leh French Open champion kawp thei hi an tam lo hle - Rod Laver, Jan Kodes, Bjorn Borg, Andre Agassi, Rafael Nadal leh Roger Federer te hi he Grand Slam pahnih a champion kawp thei te an ni. Nikum khan Novak Djokovic chuan a vawi khat nan French Open-ah hian a champion a, player ropui zingah hian lam hmaih thei a ni tawh bik lo.

Nadal leh Toni

Rafel Nadal-a'n kum 2005 aṭanga 2014 inkarah khan vawi khat chiah French Open nomawi chawi loh a nei. Vawi kua a champion ṭuma a kianga mi pawimawh tak chu a coach leh a patea (uncle) ni bawk Toni Nadal a ni.

Spain tlangval Nadal leh Toni te hi kumin bak an thawkdun tawh dawn lo a, inkawp chunga Paris inelna lian an hmachhawn hnuhnung ber a ni dawn - kum dang zawng aiin champion an duh ang.

Coach Toni Nadal chuan, "Kum dang kan ngaihtuah thei lo, tun ṭuma kan inkhelh tur chiah kan rilruah kan dah. Nakkumah eng nge rawn thleng dawn kan hre lo a, season tharah coach ka nih tawh dawn loh avangin buaina tur a awm lo," a ti.

World number 4 Nadal-a'n kuminah Monte Carlo, Barcelona leh Madrid Open nomawi a zawin a chawi leh tawh a, heng inelna te hi clay court-a khelh vek a ni. "The King of Clay" tia an sawi ṭhin hian engtiang takin nge French Open a khelh leh dawn tih chu khawvel hmuh châk a ni.

A pui bik

ITF hnuaia inelna dangte aiin Grand Slam hi a hlu bik a, ranking point an hmuh hnem theihna ber leh lawmman atana pawisa fai an dawn hnem theihna ber a ni bawk. Player langsar zawng zawngin inlan an châk a, mipuiin an ngaihven bik hle bawk.

Amaherawhchu Grand Slam-ah hian a duh apiang tan a inlan theih loh. Grand Slam inelna bikah hian main draw khel turin world number 100 chin nih a ngai a, qualifying khel tur pawhin number 200 chin tal nih a ngai. Player duhsak bik tan wildcard pek ṭhin an ni bawk.

Major tournament pali zingah kum 1877 aṭanga khelh ṭan Wimbledon a upa ber a, a dawtah US Open (1881) niin an hnungah French Open (1891) leh Australian Open (1905) te an awm.

Inlan lo tur langsar

Kumin French Open mipa singles khel tur lo tur zinga hming langsar ber chu Roger Federer a ni. Swiss star hian kuminah a khel ṭha hle a, Australian Open bakah Indian Wells leh Miami-ah a champion.

Mahse, Federer hian a vanglai pawha a hlawhtlin hlehtheih lohna clay court-ah inlan lo tlang a thlang. Grand Slam vawi 18 champion tawh Federer chuan, "Hun rei zawk inkhelh ka duh vang a ni," tiin Roland Garros-a a inlan loh tur thu a sawi a, grass court-a inlan thei turin a inbuatsaih thu a sawi bawk.

Hmeichhe singles khel tur zingah Australian Open champion Serena Williams hming a tel lo. American star hian a pakhatna atan fa a pai mek a, kumin favang velah neih a beisei - hei vang hian a inlan dawn lo.

Hrem a nih hnua rawn kir hlim Maria Sharapova-i'n wildcard dil mah se pek a ni lo a, vawi hnih a champion tawhna hmuna inlan phak turin a ranking a sang tawk lo - Russian star tan khelhna hmun a awm dawn lo a ni.

French tennis historian Jean-Christophe Piffau chuan, "Player langsar ṭhenkhat inlan thei dawn lo mah se Roland Garros hi a hlutna a hniam phah dawn lo. He hmun hi inzirna leh nomawi hlu bik chawina hmun a ni reng dawn a, player-te liam ṭhin mah se tennis hlutna chu a awm reng dawn tho a ni," a ti.