FA Cup final khel lo tur Koscielny

Arsenal defender rinrawl Laurent Koscielny chu Inrinni zana Chelsea nen Wembley Stadium-a FA Cup final an khelh hunah a inlan ve thei dawn lo.

France international hi Premier League match hnuhnung bera Eveton an mikhual ṭumin minute 14-na lekah Enner Valencia a tihtluk avangin red card pek nghal a ni a, match thum khel lo tura hrem a ni. Hremna hi Wembley Stadium-a Blues an hmachhawn hun aṭangin a inṭan chiah ang.

Gunners chuan Football Association (FA) hnenah Kos­cielny hremna hi hnuk kir turin an ngen a, mah se an ngenna hi hnawl sak an ni thung. Hremna kaltlang pui a nih dawn avang hian Blues an hmachhawn hun bakah season thara an match hmasa pahnihah a inlan dawn lo.

England-a football thuneitu sang FA chuan thuchhuah siamin, "Laurent Koscielny hi Everton nen an inkhelh ṭumin a thil tihsual avangin hnawhchhuah a ni a, an club-in inelna an hmachhawn hmasa pathumah a inkhel ve thei lo ang," an ti.

Arsene Wenger-a'n Arsenal a enkawl china a vawi khat nan season tharah Champions League a khel phak dawn lo, season duhawm lo a hman mek hi FA Cup champion nichunga a khar thei a nih chuan pressure sang lutuk tur a zia deuh mahna!

Mahse, Wenger hian a defen­der pawimawh ber a chân dawn tih a chiang ta a, vawi ruk a champion tawhna FA Cup chawi turin kawng a harsa sawt dawn tihna a ni.

Arsenal an buai?

Wenger tan Premier League champion hmachhawn turin tlar­hnungah player remkhawm thiam a har khawp ang. Germany international Shkodran Mustafi dinhmun a la chiang lo a, Everton an hneh ṭum hian Gabriel Paulista chu zawn chhuah a ngai - Per Mer­­tesacker erawhin Blues a hma­­chhawn thei tura ngaih a ni thung.

Kum 31-a upa Koscielny hian season liam ta khan league match 32 a khel a, a hliam a nih ngawt loh chuan Wenger-a'n inkhel bul a ṭantir ṭhin. League mai bakah Champions League thlengin tlarhnungah rinrawl a ni.

Tun season-a Bayern Munich nen Champions League last 16-a an intawn ṭumin hnawhchhuah a tawk tawh a, Koscielny awm laiin 1-1 a ni a, a chhuah hnuah erawh Gunners hian goal li chhuahin an khung belh miah lo.

French thlaktu German?

Arsenal hian khelmual chhung­ah hotu an mamawh a, tuna an hotu pawimawh ber chu pakhat Koscielny hi a ni. French defender hi a awm dawn loh takah chuan Mertesacker leh Rob Holding te mawhphurhna a sang zual ang.

Kum 21-a upa Holding hian nikhum nipui transfer lai khan Gunners hi a zawm a, a kum naupan ngaihtuah chuan player ṭha tak a ni mah se Mertesacker nen an la khel dun tam lo. Germany international hlui hi pre season laiin a inhliam a, a dam hnuah pawh a khel phak lo - league match hnuhnung bera Everton a hmachhawn kha tun season-a khelmual chhunga a inlan awmchhun a ni.