Cleveland chak puitu Irving

NBA Finals khel turin Cleveland Cavaliers tan match khat bak chak a ngai tawh lo. Cleveland hian nimin zing khan Eastern Conference Finals Game 4-a Boston Celtics chu 112-99 in an hneh a, series-ah 3-1 in hma an hruai - Zirtawpni zing dar 6:00-ah Game 5 an khel leh ang.

Quicken Loans Arena-a inkhelah Kyrie Irving chuan Cavs tan point 42 zet a score a, NBA playoff-a khelh tawh zawng zawnga point a score hnem ber ṭum a tawng. Nikum NBA Finals Game 5-ah point 41 score-in mimal record a siam tawh chu tun ṭumah hian a rawn khum chiah.

Season hmasa an cham­pion theih nana player langsar ber LeBron James-a'n point 34 a neih bakah rebound vawi nga lain assists ṭum ruk a nei bawk. Irving leh James an lansarh zana sawi hmaih thiang lo chu Kevin Love a ni bawk.

Kum 28-a upa Love hian Boston lakah point 17 a neih bakah rebound vawi 17 lain assists vawi nga a nei bawk. American power forward hi regular season laiin hliam vangin inlan tam tawk lo mah se a dam hnuah erawh player pawimawh leh ṭangkai a nei leh tawh. Cavs-in an basket an venhim theih nan tha thawhhlawk ber pakhat a ni.

Cleveland coach Ty­ronn Lue chuan, "A hma zawng aiin kan khing­puite kan nawr na zawk a, tharum kan hmang hnem bawk. First half-ah inveng thei viau mah se inkhel chawhnu lamah kha chuan min dang zo lo a ni," tiin a naute khelh danah a lawm hle.

Eastern Conference Finals-ah Cavs hian an match hmasa pahnihah harsatna nei loin hnehna an chang thei a, a vawi thumnaah erawh rin loh takin an tlawm. Game 4-ah pawh quarter thumna tawp lam thleng chu a hnufual zawkah an ṭang, Boston lam hian Game 5-ah thapui an thawh ve leh dawn a, chak zawk tur sawi lawk ngawt theih a ni lo ang.

Celtics coach Brad Stevens chu a nauten Ir­ving an ven danah a lung­awi lo. Stevens chuan, "Duhthlan tur kan siamsak hnem lutuk a ni, kan hnaih chilh lo a, point a score tam tak kha chu a thiam vang ni bawk mah se kan ven ngun tawk loh vang a ni," a ti.

Stevens chuan sawi zawmin, "Playoff bikah kan khelmualah beisei ang result kan nei lo fo, tun ṭumah erawh duhthusama ṭhain kan khelh a ngai tawh ang," tiin Game 5 a thlirlawk, regular season duhawm taka an hman tawh chu a thlawn a liamtir mai a tum lo hle.

Regular season-ah khan Celtics hian vawi 53 hnehna changin ṭum 29 chak loh an nei a, Eastern Conference table-ah hma­hruaitu niin vawi 51 hneh­na changtu Cleveland chungah an awm a ni.