Ballon d'Or dawng tura Buffon duhsaktu Pique

Gerard Pique chuan player chawi­mawina sang Ballon d'Or chu Gianluigi Buffon-a'n dawn a phu hlein a hriat thu a sawi chhuak.

Kum 39-a upa Buffon hian Italy leh Juventus tan football nun nuam leh ropui tak a hmang tawh a, club inelna lama a hmabak lian tham awmchhun chu Champions League nomawi chiah a ni. June 3 khian Real Madrid nen Cardiff-ah final an khel ang.

Juve legend hian Serie A nomawi pariat, Coppa Italia pathum bakah Supercoppa Italiana title panga a la tawh, an ram Italy chu kum 2006 FIFA World Cup-ah khan a champion pui bawk.

Barcelona defender chuan a teammate Lionel Messi-a'n Ballon d'Or chawimawina chu a vawi ruk nan dawn a phu thu a sawi a, hetih lai hian tun season bikah chuan Buffon tan a duhsak thung.

Spain international Pique chuan, "Messi hian Golden Shoe a dawng a, Bal­lon d'Or pawh a phu hle. Mahse, Buf­fon dinhmun kan en erawh chuan he chawimawina dawn hi a phu hlein ka hria. Serie A bakah Coppa Italia a chawi tawh a, Champions League champion thei dinhmunah a ding mek bawk," tiin a sawi.