Man United an champion kim ta

Manchester United-in nomawi duhin Jose Mourinho an lalut a, Portuguese manager hian season khat chhung lekin nomawi pahnih a lakpui nghal. Nilaini zan khan English club hian tun hmaa an la champion ngai lohna Europa League nomawi chawi turin Ajax 2-0 in an hneh.

United hian tun hmain UEFA Champions League leh European Cup Winners' Cup-ah te an champion tawh a, Europa League an champion leh takah chuan Europe-a inelna lian thamah an champion vek tawh tihna a ni. Hetiang dinhmunah hian Ajax, Chelsea, Juventus leh Bayern Munich te an ding tawh bawk.

Mourinho kaihhruai
Friends Arena, Stockholm-a inkhelah United-in minute 18-na lekah goal hma­hruai an khung. Paul Pogba-a'n box pawn aṭanga petin Ajax defender Davinson Sanchez a per hnuah a goal. Armenian midfielder Henrikh Mkhitaryan-a'n minute 48-naah corner aṭanga Chris Smalling tauh thlak chu a kheng goal nalh hle.

United-in goal hnih an khung a, Mourinho enkawl tih hriat takin goal an chhuah lo. Dutch club hian ball possession 69% zet nei mah se Argentine keeper Sergio Romero tan harsatna an siam pha lo. Portuguese manager hian Europe-a club inelnaah a club enkawl vawi li final a luh pui tawh a, hnehna an chang vek.

Player lei thiam
Mourinho-a'n khawvel player manto ber ni turin Paul Pogba a lalut a, tun season-ah French midfielder hian sawisel a hlawh nasa hle. United lakluh zinga mi Henrikh Mkhitaryan pawhin beisei a phak lo.

Amaherawhchu, 'The Special One' in player thlan a thiam tih nemnghet nan Stockholm-a goal khungtu chu Pogba leh Mkhitaryan te an ni. Portuguese mana­ger lakluh player dang pahnih Zlatan Ibra­himovic inhliam lo se Eric Bailly hrem ni lo bawk se hmun pawimawh chang tur an ni.

A mamawh tur player la thiam Mourinho chuan, "Zlatan-a'n final a khel lo hi pawi ka tihpui a, chutihrualin khelmual pawnah pawh a pawimawh a ni. An ram a nih miau avangin Swedish ṭawngin ball boy ho pawh hmanhmawh lo turin a hrilh. A career ropui taka Europe-a inelna liana a champion thei hi ka lawmpui a ni," tiin a sawi. Swede forward Zlatan hian Champions League a la chawi lo a, tun hi Europa League a vawi khat chawina a ni bawk.

Hello, UCL
Manchester United-in league-ah an khingpui vawi 15 zet an draw a, parukna nichungin season khar mah se Europa League an champion avangin Champions League an khel dawn a, Mourinho pawh a ṭawng pawr hle.

Kum 54 mi Mourinho chuan, "League-a pahnihna, pathumna leh palina nichunga Champions League khelh phak ai chuan Europa League champion chunga Champions League khelh hi kan duh dan a ni. Tunah chuan kan club hian nomawi chawi theih zawng zawng an chawi ta a, hemi dinhmun thleng tur hian kan thawkrim a ni," tiin league-a an tluk loh Tottenham Hotspurs, Manchester City leh Liverpool te aiin an dinhmun a thlanawm zawk thu a sawi.

Final hmain Ajax champion theih dan kawng ziaktu an tam a, hemi chungchang sawiin United boss chuan, "Football chungchangah thu thiam tak tak an tam a, amaherawhchu hetiang ho hian nomawi an chawi ngai lo. Keini chuan boruaka kan ṭhat zawk chuan ball kan vawrh mai a, kan khingpuite ṭhat lohna laiah tak kan nawr a ni. Khelh dan kan thiam a, harsatna nei loin kan chak a ni," tiin a game plan a hlawhtlin thu chhuang takin a sawi.

Europa League Thlirna Tawi
Final
Ajax 0 - 2 Manchester United
Man Utd : Paul Pogba 18'; Henrikh Mkhitaryan 48'

Season thara UCL khel turte
Manchester United-in Europa League an champion avangin season tharah Champions League an khel dawn a, playoff khelh ngai loin group stage an thleng nghal.
Europe inelna sang ber UCL group stage-ah hian team 32 an tel ṭhin a, tunah hian team 22 chu an tling chiang tawh. Hmunruak 10 dang hi qualifying hmanga la zawn tur a ni a, Premier League palina Liverpool pawhin group stage thleng turin playoff an paltlang phawt a ngai dawn a ni.

Team 22-te chu
Spain : Real Madrid, Barcelona, Atletico Madrid
Germany : Bayern Munich, RB Leipzig, Borussia Dortmund
England : Chelsea, Tottenham Hotspur, Man City, Man United
Italy : Juventus, Roma
Portugal : Benfica, Porto
France : Monaco, Paris Saint-Germain
Russia : Spartak Moscow
Ukraine : Shakhtar Donetsk
Belgium : Anderlecht
Netherlands : Feyenoord
Turkey : Besiktas
Switzerland : Basel