EL nomawiin hlimna a thlen - Beckham

Manchester United legend David Beckham chuan Europa League nomawi avang hian hun harsa tak karah hlimna a thlen thu a sawi.

Red Devils-in Stock­holm-a Ajax a hneh hma ni hnihah Machester Arena-ah bomb a puak a, mi 22 an thi a, mi 64 an inhliam bawk.

England captain hlui Beckham chuan, "Final pawimawh dan kha infiamna piah lam a ni. Kan hmangaihte thihna vangin kan chan a, kan ngui a ni. Hetiang hunah hian infiamna hian hlimna tlem min pe a, muanna awm theih nan kan ṭawngṭai a ni," tiin a sawi.

Final hma hian United official leh supporter-te pawhin final hi Man­chester-a chhiatna aiin a pawimawh loh zawk thu an sawi a, hei vang hian player-te pawhin theih tawp an chhuah.

Goal hmahruai khung­tu Paul Pogba chuan, "Khawvel hmun hrang hrang Manchester, Lon­don leh Paris ah te chhiatna hi a thleng tawh. Chhiatna tuartute tana kan khelh a ṭul a, kan tan chuan inkhel pawimawh bik a ni. England tan, Manchester tan leh thi ta te tan kan theihna zawng zawng kan chhuah a ni," tiin Man­chester-a bomb puakin team chhungah pawh nghawng a neih thu a sawi.

Manchester-a piang leh seilian Marcus Rashford chuan, "Manchester, i tan," tiin thu tawi awmze nei tak a sawi.

Stockholm-a Friends Arena-ah pawh United ṭantute inkhelh banah 'Manchester, Manchester, Manchester' tiin an au rual a, Ajax ṭantute an zawm ve bawk. Football-a an elpui Manchester City pawhin United an lawmpui thu an ziah rualin Manchester khawpui tana an din dun tlat thu an ziak ve bawk.