Agassi hi Djokovic leh tennis tan a ṭha - Murray

Andy Murray chuan Novak Djo­kovic leh Andre Agassi te thawk­­dun tur chuan a barakhaih thu a sawi a, hlawkna an chhar chhuah ngei a beisei thu a sawi bawk.

Season hmasa chaw­hnu lam aṭangin Djokovic-a'n court chhung­ah beisei a phak lo a, coaching staff zawng zawng nen an inṭhen phah hial. Pathianni aṭanga khelh ṭan tur French Open atan world number 1 hlui Agassi chu thawhpui atan a sawm chhuak.

World number 1 Murray chuan, "Andre leh Novak an thawkdun dawn! A lawmawm rualin min barakhaih hle, star player ni ṭhin kha coach angin a inlan leh dawn a ni a, mipuiin an ngaihven phah sawt ang le. Novak tan hna ṭha tak a thawh ngei ka ring a, tennis tan pawh ani a inlan tur hi a ṭha hle bawk," tiin a sawi.

Britain tlangval Murray leh Djokovic te hi tun hnai kum thum chhung vel chu mipa tennis khawvela inel ber an ni a, kuminah erawh an pahnih hian beisei an phak lo. Paris-a hlawhtlinna an chan theih nan kawng hrang hrangin hma an la mek a ni.

Djokovic-a coach tur Agassi hi kum 47-a upa a ni a, a vanglai chuan khawvela tennis thiam berte zinga mi a ni. Grand Slam nomawi vawi riat chawi tawhin kum 2006 US Open zawh khan tennis a chawlhsan a ni.