CYMA Football ; ITI Veng, Leitan, Chatlang leh Aizawl Venglai chak

CYMA leh MFA ṭangkawpin an buatsaih TṬ Royte Trophy - Inter Branch YMA Football Tournament Last 32 chu nimin aṭang khan Lammualah khelh

ṭan a ni a, pre quarterfinal aṭangin fixture hi pawh ṭhat leh tur a ni.

ITI Vengin nimin inkhel hmasa berah vawi hnih cham­pion tawh Dinthar chu penalty shootout hmangin an hneh a, Tuikual North lakah Leitan comeback-in 2-1 in hnehna an chang. Chaltlang-in Kawrte­thawveng lakah goal khung thei lo mah se vawi hnih champion tawh veng hi penalty shootout-ah an vannei tho a, match hnuhnung berah CYMA Football final la tem lo Aizawl Venglaiin kum 2012 finalist Chanmari West chu 1-0 in an hneh bawk.

ITI Veng an tlo

ITI Vengin an match hmasa berah Tlungvel Jt YMA 3-0 a hnehin bul an ṭan a, Hlimen lakah goal khat an phur hnuah 2-1 in an lehthal leh bawk.

Last 16 lut turin ITI Veng aiin sulhnu nei ṭha zawk Din­thar rinkai zawk an ni a, amah­erawh­chu veng pahnih goal nawr a na tawk lo. Kum 2002-a CYMA Football nomawi hnuhnung ber chawitu Dinthar tan winger Lal­biaksanga'n first half-ah chance

ṭha bik a hlah a, goal chance ṭha dang hmuh tur a awm lo.

ITI Vengin MPL hmasa ber champion thei Dinthar FC awmna veng an hneh a, Last 32 match hmasa berah upset a thleng nghal.

Leitan an kal zel

Leitan-in Bethlehem Veng­thlang lakah goal hnih an chhuah hnuin goal hnihin an chhang let a, penalty hmangin hnehna an chang. Tuikual North lakah pawh Leitan hian goal khat an chhuah hnuah goal hnih thoin an chhang let a, 2-1 in an chak.

NECS Cup 2013 finalist Leitan hi inkhelah an chungnung bik lo. First half-a Tuikual North forward Lalremruata goal khung chu Leitan-in C. Lalrin­chhana penalty hmangin an sut a, minute nga chauh awm tawh tihin rawlthar duhawm Ramhlunchhunga'n yard 25 aṭangin mawi zetin chakna goal a khung.

Tlarhnung phui Chaltlang

CYMA Football-a Chal­tlangin harsatna nei loiin Last 16 an thleng a, Kawrtethawveng lakah goal khung theihna hun ṭha nei mah se goal an khung thei lo.

Penalty shootout-ah vawi thum final lut tawh Chaltlang hian 4-2 in hnehna an chang a, tun inelnaah hun pangngaiah goal an la chhuah lo.

Aizawl Venglai an vannei

Aizawl Venglaiin Lalbiak­zuala hmangin minute 17-naah hma an hruai a, MPL club nei Chanmari West-in siphurh sut tumin an nawr na hle. Hun tawpah Vanlalbiaa Chhangte-in an siphurh sutna goal a khungah a inngai a, referee pawhin

ṭawmpui mah se thutlukna sutin Chanmari West goal hi pawm a ni lo. Aizawl Venglai 1-0 in an chak.

Mabiaa hian an khingpui lamah ball a pet phei a, fair play a nih avangin Aizawl Venglai defender ten keeper an kian a, Chanmari West winger hian tumahin an la khawih hmain ball hi khawih nawnin goal-ah a chantir a, vawi hnih a khawih hman avangin goal hi pawm a ni lo. Aizawl Venglai an lawm a, Chanmari West an lungawi lo.

Vawiinah Team ṭha

Vawiin inkhel hi Aizawl khaw pawn pahnih inkhel aṭangin khelh ṭan a ni ang, Zawlnuam Borai leh Samlukhai ten match hmasa ber an khel dawn a ni.

Aizawl khaw pawn aṭanga CYMA Football champion thei awmchhun Lengpui leh vawi thum champion tawh Electric Veng inkhel a ngaihnawm dawn a, Mizoram pawn leh chhunga khel player ṭha an kawl ve ve avangin inkhel a hmuhnawm dawn.

Champion rinkai Ramhlun South leh Ramthar Veng inkhel boruak a sang dawn. Kum 2004 champion Ramthar Veng hian an ṭhenawm veng laka tlawm an hreh ang.

Aizawl khaw pawnah Khaw­zawl Jt YMA hi team ṭha zinga chhiar tel an ni a, an khingpui Republic Vengthlang hian Last 32-in Serchhip Dinthar an hneh. Tun inelnaa tlarhnung player nei ṭha ber zinga mi Republic Vengthlang hian Khawzawl Jt YMA pawh thawn haw an tum dawn a ni.

Last 16 lut tawh (4)
ITI Veng, Leitan, Chatlang, Aizawl Venglai
Round of 32 - LAMMUAL
Nimin Inkhel Results
Dinthar 0 - 0 ITI Veng
Penalty Shootout-ah ITI Veng 4-2 in an chak
Leitan 2 - 1 Tuikual North
LEI : C. Lalrinchhana 60'; Ramhlunchhunga 85'
TUI : Lalremruata 32'
Kawrtethawveng 0 - 0 Chaltlang
Penalty Shootout-ah Chaltlang 4-2 in an chak
Aizawl Venglai 1 - 0 Chanmari West
AIZ : Lalbiakzuala 17'
Vawiin Inkhel Tur
09:30 AM Zawlnuam Borai Vs Samlukhai
11:30 AM Lengpui Vs Electric Veng
01:30 PM Ramhlun South Vs Ramthar Veng
03:30 PM Khawzawl Jt YMA Vs Republic Vengthlang
May 30, Thawhlehni
09:30 AM West Phaileng Jt YMA Vs Chanmari
11:30 AM Republic Veng Vs Ramhlun North
01:30 PM Hualngohmun Vs Khatla
03:30 PM Ramhlun Vengthar Vs Chhinga Veng
May 31, Nilaini
09:30 AM Khawlailung Vs Salem Veng
11:30 AM Kelsih Vs Bawngkawn
01:30 PM Durtlang Vs Luangmual
03:30 PM College Veng Vs Kawnpui Vengthar