Simona Halep dinhmun a chiang lo

Pathiani aṭanga khelh ṭan tur French Open-ah Simona Halep a inlan theih dawn leh dawn loh a chiang lo. Halep hian a ke rekah hliam a tuar a, amah enkawltu doctor chuan a dinhmun chu '50-50' tiin a sawi.

Karhmasa a khelh zawh tak Italian Open final-ah Halep hi a inhliam, Elina Svitolina lakah 4-6, 7-5, 6-1 in a chak loh phah a ni.

Romanian star chuan, "In enkawl ka duh avangin Paris ka pan hma bik a, MRI scan-a a lan dan chuan chawlh deuh ka mamawh. Doctor-in ka inkhelh theih dawn leh dawn loh chu 50-50 a nih thu a sawi a, Roland Garros-a ka inlan theihna tur a nih chuan ka tih theih ang zawng zawng ka ti ang," tiin a sawi.

Kum 2014 French Open finalist hi Nilaini thleng kha chuan court-ah a la practice thei lo, clay court inelna lianah hian a inlan a nih pawhin duhthusama fit chu a ni kher lo mai thei a ni.

Kumin Roland Garros-ah hian hmeichhe player langsar Serena Williams leh Maria Sharapova te an inlan dawn lo tih a chiang tawh a, nikum December thla aṭanga la inkhel leh lo Petra Kvitova erawh a inkhelh theih beisei a ni thung.