Lionel Messi-a'n thiam loh a chang

Lionel Messi leh a pa Jorge te chuan July 2016-a Barcelona court-in chhiah awl ruk chungchanga thiam loh a chantir tawhna chu Spain Supreme Court-ah ngaihtuah nawn turin thlen mah se an dilna hi hnawl a ni a, thiam loh an chang.

Messi leh a pa Jorge-te hi 2007-2009 inkar chhung khan pound maktaduai 3.5 bawr vel chhiah awl ruah puh an ni a, thla 21 lungin tang tur leh pound maktaduai thum bawr vel chawi tura tih an ni. Messi pa Jorge zawk hi a chhiah awl ruk a rulh ṭhen avangin thla 15 tang turin a tan hun chhung hi tih tawi sak a ni.

Mahse, Spain ram danah kum hnih tling lo tang tura hrem chu 'tharum thawhna lam hawi' a nih loh chuan an tan kher a ngai lo a, mahse hrem an nih hun chhung erawh enthlak reng an ni dawn thung.

Nikuma a thubuai ngaihtuah a nih ṭumin Messi hian, "Football bak kei chuan ka ngaihtuah lo a, ka sum chevel chungchangah ka inrawlh lo," tiin a thiam thu a lo sawi tawh. Mahse, Spain Supreme Court chuan Messi insawifiahna hi an pawmsak lo.

"Sum tam tham tak lalutin chhiah pek a ṭul a ni tih hre lo anga a insawi hi thil awihawm loh tak a ni," tiin Barcelona forward insawifiahna a hnawl sak a, a pa nen thiam loh chantir an ni ta a ni.