CYMA Volleyball boruak a lian zel

Central YMA leh Mizoram Volleyball Association buatsaih D3 Amrit Cement 22nd Inter Branch YMA Volleyball Tournament chu R. Dengṭhuama Hall, Mualpuiah khelh chhoh mek a ni a, veng/khua inelna a nih avangin entu pawh an ṭhahnem thei hle.

Mipa inelnaah hian team 104 an tel a, first round khelh zawh tawh niin nimin aṭang khan team 64 awmna second round khelh ṭan a ni. R. Dengṭhuama Hall hi court pathumah siam a ni a, mipa inelna hi court 1 leh court 2-ah neih niin court khatah match ruk zel a awm.

Hmeichhe inelnaah hian team 38 an awm a, nimin khan first round match ruk khelh a ni a, team 32 chiah an awm tawh. Second round hi vawiin aṭangin court 3-ah khelh ṭan a ni dawn a, nimin lama chak Mualpui leh Vaivakawn te an inlan lehnghal ang.

A hlawhtling
Hlawhtling tih ṭawngkam hman nan chuan a la hma deuh a, chutihrualin first round aṭanga entu ṭha tak an awm avangin inelna neih chin chu a hlawhtling phawt. Team an inthlifim zel ang a, stage sang chinah tun aiin boruak a la sang thei ang.

Organising Committee chairman leh CYMA Sports Sub Commiittee chairman R. Lalrinmawia (Marina) chuan, "Central YMA buatsaih a nih avanga champion pawh tum chiah lo, amaherawhchu inelna tihhlawhtlin nana rawn tel ve hrim hrim Branch te an awm a, an chungah kan lawm hle. Tuna khelh chinah player inchuh chiam chiam te a awm lo a, Branch YMA-ten dik taka thil an titlang nia kan hriat avangin kan lawm hle bawk," tiin Vanglaini a hrilh a, MVA nen an thawhhona ṭha chu lawmawm a tih thu a sawi bawk.

MVA secretary C. Lalrokhuma (Puitea) chuan, "A tir aṭanga entu ṭha tak kan neih nghal avangin kan lawm hle. Volleyball hruaitu thlirna aṭang chuan kan khelh danin hma a sawn hi a lawmawm. Inelna hnuhnung ber kum 2018 aṭanga thlir chuan kan khel a mawi hle a ni," tiin Vanglaini a hrilh.

Engtin zel?
Inkhel en man hi Rs 20 chauh a ni a, inkhel hi chawhma dar 10:00 aṭangin an ṭan. Match khatna tih loh hi chu inkhelh hun tarlan lawk theih a ni lo a, match hmasa lam zawh hma danin match hnung lamah nghawng lian tak a nei.

Inkhel hi LPS10-ah pekchhuah a ni a, a hmuna kal thei lo tan pawh TV kaltlanga en theihin chhawpchhuah a ni.