August 1 aṭangin I Day Football

Mizoram Football Association chuan I Day Football Tournament-ah mipa, hmeichhia leh veteran tán inelna a buatsaih dawn a, August 1 aṭanga khelh ṭan tur niin August 15-ah final hi khelh a ni ang.

Mipa inelna hi Mizoram Premier League club pariat - Aizawl FC, Chanmari FC, Chawnpui FC, Chhinga Veng FC, Electric Veng FC, FC Bethlehem, FC Venghnuai leh Mizoram Police FC ten an khel dawn.

MPL club hian inbuatsaihna an nei ṭan a, transfer boruak thawm pawh a ring ta hle. Tun season hian MFA chuan district hrang hrangah Centralised Registration System (CRS) a kalpui dawn a, August 31, 2022 thleng transfer leh registration a tih theih dawn. Hemi awmzia chu I Day Football zawhah MPL club ten transfer an la nei thei dawn tihna a ni.

Mizoram chhunga club football inelna sang ber Mizoram Premier League pawh khelh chhunzawm a ni tawh dawn a, inelna ṭan hun la tih chian chiah ni lo mah se August thla tawp emaw September thla tir emawah khelh a ni ang.

I Day Football-a hmeichhe inelna hi MFA Women's Committee lamin an buaipui dawn a, 'talent search' atan hman a ni dawn. Team awmsa an awm lo a, team din duh tan a tel theih. Hre chiang duh tan Secretary, MFA Women's Committee R. Lalramzauva (9436156858) zawh fiah theih a ni.

Veteran I Day Football-ah kum 40 chung lam tan a tel theih a, July 23, 2022 hmain MFA Office-ah entry fee Rs 1,000 pek tur a ni. Kum 1982-a piang chin an khel thei ang a, inkhelh dan kalphungah playing 11-ah 40+ (1982) mi panga, 45+ (1977) - mi pali leh 50+ (1972) mi pahnih an awm reng tur a ni ang. Hre chiang duh tan Secretary, MFA Veteran Committee Hmingthansanga (9436146386) zawh theih a ni ang.