Brighton-in Man City dilna hmasa an hnawl

Manchester City chuan full back Marc Cucurella chu pound maktaduai 30-in Brighton & Hove Albion lei an dil a, Seagulls hian Man City dilna hmasa hi an hnawl.

Man City hian Oleksandr Zinchenko chungchangah Arsenal nen inremna an nei tawh a, Ukrainian defender hi United States-a Gunners training-naah pawh a kal tawh. Zinchenko chungchanga inremna a awm hian Man City-in Brighton hi an dawr nghal.

Brighton hian Cucurella hi pound maktaduai 50 an chhiar a, hetiang zat chuan Man City-in lei an tum lo a, Seagulls hi an tawlh duh loh chuan player dang an melh ang. Chutihrualin Man City hian an ngamna zat hi pound maktaduai 30 aiin an la tisang thei thung.

Kum 23 mi Cucurella hi Catalonia-a piang a ni a, Barcelona academy aṭanga inzir chhuak ni mah se Barca senior team tana a khelh phak loh avangin Getafe-ah a kal. Getafe-ah hmun pawimawh changin kum 2021 khan Brighton-in an lalut a, season khatnaah league match 35 khel nghalin goal khat a khung.

Man City hian full back manah sum an seng nasa ṭhin a, tuna an player pahnih Kyle Walker leh Joao Cancelo te manah pound maktaduai 105 an seng ngam a, amaherawhchu Cucurella erawh Walker leh Cancelo te angin top flight leh international-ah record a nei ṭha tawk loa ngaih a ni.