Lewy tel lohna Bayern

Bayern Munich-in Robert Lewandowski an hralh tawh a, Julian Nagelsmann-a'n khawvel striker ṭha ber zinga mi Lewy tel loin a insiamrem a ṭul dawn. German champion hian nimin zing khan Audi Field, Washington-ah DC United nen friendly match an khel a, 6-2 in hnehna an chang.

Bavarians tan hian Liverpool aṭanga an lakluh Sadio Mane-a'n minute ngana lekah goal a khun nghal. Marcel Sabitzer, Serge Gnabry, Matthijs de Ligt, Joshua Zirkzee leh Thomas Muller ten goal khat ṭheuh an khung bawk.

Lewy tel lohna
Bayern-in Bundesliga-a goal 238 zet khung saktu Robert Lewandowski an chan a, Polish striker hian season liam ta ringawt pawh khan goal 35 a khung. Heti khawpa striker ṭha Lewy awm lo hi Bayern tan channa nasa tak a ni dawn a, chutihrualin Nagelsmann tan chona thar tihin a sawi theih bawk.

German champion hian Liverpool aṭangin pound maktaduai 35-in Mane an lalut a, Senegal forward hi Lewy thlakna turah a ngaih theih. DC United nen hian Mane hi tlarhmaah a awm a, rawlthar Lucas Copado leh Leroy Sane te a hnungah an awm a, mual sir aṭangin Aphonso Davies leh Serge Gnabry te an awm bawk.

Bayern hian attacking game mawi tak an lantir a, Mane, Sane leh Gnabry te goal bawh a na hle. Liverpool forward hlui Mane hian minute ngana lekah penalty aṭangin a khung a, a goal khung pahnih dang erawh offside vangin an pawm lo. Minute 12-naah Marcel Sabitzer-a'n a khung belh leh bawk. Inkhelh ṭantirh minute 16 chhung Bayern tlarhma chevel chu mawi tak a ni a, amaherawhchu friendly match chauh a ni tih hriat a ṭha.

Squad a chhah em?
Bayern hian kum 18 mi Copado bakah kum 16 mi Paul Wanner te an inlan tir a, season liam ta pawha vawi li ngawt inlan tawh Wanner hi kum 16 mi chauh a ni tih hi awihawm loh zawk hial.

Kum 22 mi Bayern youth chhuak Josip Stanisic pawh a rintlak hle. Stanisic hi season liam ta khan league-ah match 13 an khel a, hmun pawimawh chan chhunzawm pawh rinawm chiah lo mah se squad ti chaktu a nih theih a rinawm.

Bench aṭangin Thomas Muller a rawn lut a, veteran forward Muller luh hnuah an goal bawh a na sawt. Kingsley Coman pawhin a khelh dan aṭangin hmun pawimawh a chang leh dawn tih a hriat theih a, Joshua Zirkzee pawhin goal a khung bakah team tichaktu a ni thei tih a pholang bawk.

Tlarhnung mawlh hi
Season liam ta khan Bayern hi chiang takin an champion a, goal 97 tehmeuh an khung. Amaherawhchu Bayern hian goal 37 an chhuah a, palina RB Leipzig nen an goal chhuah zat a in ang a, an tlarhnung a phui tawk lo tih a hriat theih.

Nagelsmann pawhin tlarhnung awm dan tur a thlak kual a, defender pali bakah pali leh pathum chawhpawlh leh pathum thlengin a enchhin. Juventus aṭanga pound maktaduai 65.6 senga an lakluh Matthijs de Ligt pawh a inlan a, goal khung nghal mah se bench aṭanga lut hi an thlak nawn. De Ligt hian vawi hnih khat tihsual a nei a, Bayern tlarhnunga hmun pawimawh chang turin a insiamrem chak a ṭul dawn.

Bayern hian July 24, Pathianni zing dar 4:30 hian English champion Manchester City nen Lambeau Field, Wisconsin-ah friendly match an khel leh dawn. Pep Guardiola hote hmaah Nagelsmann-a naute fiahin a awm ang.

Friendly - July 21, Ningani
DC United 2 - 6 Bayern Munich
DCU : Skage Simonsen 54'; Theodore Ku-DiPietro 83'
FCB : Sadio Mane 5'(P); Marcel Sabitzer 12'; Serge Gnabry 44'; Matthijs de Ligt 47'; Joshua Zirkzee 51'; Thomas Muller 90+2'

Friendly - July 24, Pathianni zing
Bayern Munich 04:30 AM Manchester City
DFL-Supercup - July 30, Inrinni zan
RB Leipzig 12:00 AM Bayern Munich
Bundesliga - August 5, Zirtawpni zan
Eintrancht Frankfurt 12:00 AM Bayern Munich