Dybala-a'n AS Roma a zawm

Argentina forward Paulo Dybala chuan AS Roma a zawm. Dybala hian Juventus tana a contract a hmang zo a, man nei loin Rome khawpui hi a pan - season thum chhung cham turin inremna hi an ziak a ni.

Kum 28 mi Dybala hi Serie A club lian dang Inter Milan leh Napoli te pawhin an ngaihven. Mahse, Jose Mourinho enkawl AS Roma zawm a thlang. Inremna an ziah zawh hnuah, a club thar tana bul ṭan hlan a nghakhlel tih a sawi nghal.

Juve tan season sarih a khelh chhung khan match 293 khelin goal 115 a khung a, assist vawi 48 a nei bawk. Turin club tan hian nomawi lian tham 12 a chawi, heng zingah hian Serie A title panga a tel, tawnhriat a nei ṭha tawh hle.

Roma hian August 14 hian season thara an league match hmasa atan Salernitana an hmachhawn dawn, an forward thar hi a inlan thei nghal ang. An league match thumnaah Dybala-a'n a club hlui Juventus a hmachhawn ang.

Hello Roma
Player theihna nei sang, fans lam ngainat leh ṭan rawn hlawh ṭhin a ni. Juventus player zingah pawh a hlawh hnem pawl a ni ṭhin. Mahse, a hun hnuhnung lamah hliamin a tibuai a, contract pawhsei ai chuan chona thar hmachhawn a thlang.

Dybala chuan, "AS Roma hi ka lo hmachhawn ve nual tawh a, fans boruak siam thiam dan leh an turu dan pawh ka hrechiang ve viau, anni thlawpna ka dawng thei tur hi ka lawm, thil châkawm leh phurawm tak chu a ni chiang hle.

"Team ngelnghet leh lungphum nghet tak nei an ni, tun hnaiah nasa takin hma an sawn bawk. Khawvela manager ṭha berte zinga mi Jose Mourinho hoa khel tur kan ni hian min tiphur zual, min ngaihventu zinga ka beisei sanna a ni," tiin a sawi.

Duhsakna
Massimiliano Allegri-a'n Juventus a enkawl hmasak ṭum khan Dybala hi a lalut, a ṭum hnih nana Old Lady a enkawl hnuah pawh a player hman thiam zinga mi a ni, tunah erawh striker Dusan Vlahovic a neih avangin a mamawhna a sang ta lo niin a lang.

Juve manager Allegri chuan, "Juventus tan sulhnu ropui tak a hnutchhiah tawh a, a club thar Roma tan pawh player ṭangkai a nih ngei ka beisei. Tammy Abraham nen an inkawp ang a, an manager chu Jose Mourinho a ni dawn bawk.

"A khelhpui tur leh amah enkawltu tur ka ngaihtuah hian Dybala hian a club zawm tur dik tak a zawm niin ka hria, thutlukna a siam sual lo turah ka ngai," tiin a sawi a, a player hlui chu hlawhtlinna chang zel turin duhsakna a hlan.

Beiseina nen
AS Roma hian season hmasa kha parukna ni chungin Serie A an hmang zo. Mourinho-a'n duhthusamin league-ah a thlensanpui tawk lo. Mahse, Europa Conference League title an la, an tan chuan European trophy hmasa ber a ni.

Roma general manager Tiago Pinto chuan, "Paulo hi player ṭha leh danglam bik a ni a, a khelh tawhna hmasa tana a hlawhtlinna leh ropuina ang kha kan tan a rawn thlen theih ngei ka beisei," tiin a sawi ve bawk.

Mourinho-a'n hmasawn turin squad a thuam chak mek. Tun nipui bazar chhungin player pali a leina a ni - Dybala hma hian midfielder Nemanja Matic, goalkeeper Mile Svilar leh defender Zeki Celik te a lo lei fel tawh bawk a ni.